Indian Premier League(IPL) 2026: తగ్గేదే లే అంటున్న బీసీసీఐ.. విమర్శలు ఉన్నా ఇంపాక్ట్ రూల్ కే జై!

Indian Premier League(IPL) 2026: ఇండియన్ ప్రీమియర్ లీగ్.. ప్రపంచంలోనే అత్యంత క్రేజ్ ఉన్న క్రికెట్ లీగ్. అయితే గత కొంతకాలంగా ఐపీఎల్‌లో హాట్ టాపిక్‌గా మారిన ఒక అంశం 'ఇంపాక్ట్ ప్లేయర్' రూల్. ఈ రూల్ ఉంటుందా? పోతుందా? అన్న సందిగ్ధానికి తెరదించుతూ బీసీసీఐ (BCCI) ఒక కీలక నిర్ణయాన్ని ప్రకటించింది. రాబోయే ఐపీఎల్ సీజన్లలో కూడా 'ఇంపాక్ట్ ప్లేయర్' నిబంధన యథాతథంగా కొనసాగుతుందని స్పష్టం చేసింది.

నిజానికి ఈ రూల్‌పై గత సీజన్‌లో భిన్నాభిప్రాయాలు వ్యక్తమయ్యాయి. ముఖ్యంగా రోహిత్ శర్మ వంటి సీనియర్ ఆటగాళ్లు, ఈ నిబంధన వల్ల ఆల్ రౌండర్ల ఎదుగుదల దెబ్బతింటుందని ఆందోళన వ్యక్తం చేశారు. కేవలం బ్యాటింగ్ లేదా బౌలింగ్ మాత్రమే చేసే స్పెషలిస్ట్ ప్లేయర్లకు ఇది వరంగా మారినా, ఇటు బంతితోనూ అటు బ్యాట్‌తోనూ రాణించే ఆల్ రౌండర్ల అవసరం తగ్గిపోతుందనేది వారి వాదన. అయినప్పటికీ, బీసీసీఐ మాత్రం ఈ రూల్ వైపే మొగ్గు చూపింది.

ఇంపాక్ట్ ప్లేయర్ రూల్ వచ్చిన తర్వాత ఐపీఎల్‌లో స్కోర్లు భారీగా పెరిగాయి. గత సీజన్‌లో మనం 250 పైచిలుకు స్కోర్లను తరచుగా చూశాం. అదనపు బ్యాటర్ ఉండటంతో జట్లు భయం లేకుండా ఆడుతున్నాయి. ఇది ప్రేక్షకులకు కావాల్సిన అసలైన వినోదాన్ని అందిస్తోంది. అలాగే, బ్రాడ్‌కాస్టర్లు , స్పాన్సర్లు కూడా ఈ రూల్ వల్ల మ్యాచ్‌లు మరింత ఆసక్తికరంగా మారుతున్నాయని భావిస్తున్నారు.

ఈ నిర్ణయంతో రాబోయే మెగా వేలంలో ఫ్రాంచైజీల వ్యూహాలు పూర్తిగా మారబోతున్నాయి. కేవలం ఆల్ రౌండర్ల కోసమే కాకుండా, ఇంపాక్ట్ ప్లేయర్‌గా రాణించగల స్పెషలిస్ట్ హిట్టర్లు లేదా డెత్ ఓవర్ బౌలర్ల కోసం జట్లు భారీగా ఖర్చు చేసే అవకాశం ఉంది. ఏదేమైనా, ఇంపాక్ట్ రూల్‌తో ఐపీఎల్ 19 సీజన్ మరింత రసవత్తరంగా మారడం ఖాయం.