Thomas Cup: కోర్టులో భారత షట్లర్ల పంజా..థామస్ కప్లో అదిరిపోయే బోణీ!
థామస్ కప్లో అదిరిపోయే బోణీ!
Thomas Cup: అంతర్జాతీయ బ్యాడ్మింటన్ కోర్టులో భారత పురుషుల జట్టు అదరగొట్టింది. ప్రతిష్టాత్మక థామస్ కప్ ఫైనల్స్లో కెనడాపై ఘనవిజయంతో టీమ్ ఇండియా తన వేటను ప్రారంభించింది. మరోవైపు ఉబెర్ కప్లో భారత మహిళల జట్టు గట్టి పోటీ ఇచ్చినప్పటికీ, స్వల్ప తేడాతో ఓటమిని చవిచూసింది.
గ్రూప్-ఏలో జరిగిన తొలి మ్యాచ్లో భారత్ 4-1తో కెనడాను చిత్తు చేసింది. తొలి సింగిల్స్లో స్టార్ ప్లేయర్ లక్ష్యసేన్.. విక్టర్ లాయ్ చేతిలో ఓడిపోవడంతో భారత్ కొంత ఒత్తిడికి లోనైంది. కానీ వెంటనే రంగంలోకి దిగిన వరల్డ్ నంబర్ వన్ జోడీ సాత్విక్ సాయిరాజ్ - చిరాగ్ శెట్టి మ్యాచ్ రూపురేఖలను మార్చేశారు. కేవలం 21-10, 21-11తో ప్రత్యర్థిని మట్టికరిపించి స్కోరును సమం చేశారు. ఆ తర్వాత ఆయుష్ శెట్టి తన అద్భుత ఫామ్ను కొనసాగిస్తూ రెండో సింగిల్స్ను గెలుచుకోగా.. హరిహరన్ - ఎం.ఆర్. అర్జున్ జోడీ డబుల్స్లో విజయం సాధించి భారత్ ఆధిక్యాన్ని పెంచింది. చివరగా అనుభవజ్ఞుడు కిడాంబి శ్రీకాంత్ ప్రత్యర్థిని చిత్తు చేసి 4-1తో విజయాన్ని ఖాయం చేశాడు.
ఇక ఉబెర్ కప్ విషయానికి వస్తే.. డెన్మార్క్తో జరిగిన పోరులో భారత్ 2-3తో ఓటమిపాలైంది. భారత స్టార్ షట్లర్ పీవీ సింధు మొదటి సింగిల్స్లో తన క్లాస్ చూపించింది. గంట పాటు సాగిన హోరాహోరీ పోరులో లైన్ క్రిస్టోఫర్సెన్పై విజయం సాధించి భారత్కు శుభారంభం ఇచ్చింది. రెండో గేమ్లో ఓడినా, నిర్ణయాత్మకమైన మూడో గేమ్లో పవర్ఫుల్ స్మాష్లతో చెలరేగిపోయింది. అయితే, ఆ తర్వాత జరిగిన సింగిల్స్లో ఉన్నతి హుడా, తన్వీ శర్మలు గట్టిగా పోరాడినా ఓటమి తప్పలేదు. డబుల్స్లో ప్రియ - శ్రుతి మిశ్రా జోడీ తీవ్రంగా శ్రమించినా విజయం దక్కలేదు. మ్యాచ్ చివర్లో సింధు - తానీషా జోడీ ఆడుతుండగా ప్రత్యర్థి ప్లేయర్లు గాయంతో వైదొలిగారు.
ప్రస్తుతం థామస్ కప్లో భారత్ గ్రూప్-ఏలో రెండో స్థానంలో ఉంది. చైనా జట్టు ఆస్ట్రేలియాపై క్లీన్ స్వీప్ చేసి అగ్రస్థానంలో కొనసాగుతోంది. భారత పురుషుల జట్టు ఇదే జోరును కొనసాగిస్తే నాకౌట్ దశకు చేరుకోవడం ఖాయంగా కనిపిస్తోంది.
