International Cricket Council (ICC): బంగ్లాదేశ్ క్రికెట్ బోర్డుకు ఐసీసీ అల్టిమేటం

International Cricket Council (ICC): 2026 టీ20 ప్రపంచకప్‌లో పాల్గొనే అంశంపై అంతర్జాతీయ క్రికెట్ మండలి (ICC) తాజాగా బంగ్లాదేశ్ క్రికెట్ బోర్డు (BCB)కు గడువు విధించింది. భారత్‌లో పర్యటించడానికి నిరాకరిస్తున్న బంగ్లాదేశ్, తమ నిర్ణయాన్ని జనవరి 21వ తేదీ లోపు తెలపాలని ఐసీసీ స్పష్టం చేసింది. ఒకవేళ బంగ్లాదేశ్ తన పట్టు వీడకపోతే, ప్రస్తుత ర్యాంకింగ్‌ల ఆధారంగా స్కాట్లాండ్‌ను ఆ స్థానంలో భర్తీ చేస్తామని ఐసీసీ హెచ్చరించింది. శనివారం ఢాకాలో జరిగిన సమావేశంలో ఈ విషయాన్ని ఐసీసీ ప్రతినిధులు బంగ్లాదేశ్ బోర్డుకు స్పష్టంగా తెలియజేశారు.

భద్రతా కారణాల రీత్యా తమ మ్యాచ్‌లను భారత్ నుండి శ్రీలంకకు మార్చాలని బంగ్లాదేశ్ పట్టుబడుతోంది. ఒక స్వతంత్ర భద్రతా సంస్థ నివేదిక ప్రకారం భారత్‌లో ముప్పు స్థాయి 'మధ్యస్థం నుండి అధికం'గా ఉందని బంగ్లాదేశ్ వాదిస్తోంది. అయితే, భారత్‌లో ఆడుతున్న బంగ్లాదేశ్ జట్టుకు కానీ, మరే ఇతర జట్టుకు కానీ ఎటువంటి నిర్దిష్ట ముప్పు లేదని ఐసీసీ తేల్చి చెప్పింది. అంతేకాకుండా, శ్రీలంకలో మ్యాచ్‌లు ఆడుతున్న ఐర్లాండ్ గ్రూప్‌లోకి మమ్మల్ని మార్చండి అన్న బంగ్లాదేశ్ ప్రతిపాదనను కూడా ఐసీసీ తిరస్కరించింది.

ఈ వివాదం వెనుక ఐపీఎల్ 2026 పరిణామాలు కూడా ఉన్నాయి. కోల్‌కతా నైట్ రైడర్స్ (KKR) జట్టు రూ. 9.2 కోట్లకు కొనుగోలు చేసిన బంగ్లా బౌలర్ ముస్తాఫిజుర్ రెహమాన్‌ను విడిచిపెట్టాలని బీసీసీఐ ఆదేశించింది. భారత్‌లో పెరుగుతున్న బంగ్లాదేశ్ వ్యతిరేక భావజాలం కారణంగానే ఈ నిర్ణయం తీసుకున్నట్లు సూచనలు రావడంతో, ఆటగాళ్ల భద్రతపై బీసీసీఐ ఆందోళన వ్యక్తం చేస్తోంది. మరోవైపు, ప్రపంచకప్‌లో ఆడకపోతే ఆటగాళ్లకు పరిహారం ఇవ్వబోమని ఒక బోర్డు అధికారి చేసిన వ్యాఖ్యలు ఆటగాళ్ల సమ్మెకు దారితీయడం బంగ్లాదేశ్ క్రికెట్‌లో ముదురుతున్న సంక్షోభానికి అద్దం పడుతోంది.