IPL 2026: ఐపీఎల్ చరిత్రలో ఉర్విల్ పటేల్ రికార్డుల వేట

IPL 2026: చెన్నై సూపర్ కింగ్స్ యువ బ్యాటర్ ఉర్విల్ పటేల్ ఐపీఎల్ చరిత్రలో సరికొత్త చరిత్ర సృష్టించారు. ఆదివారం మే 10న చెన్నైలోని చెపాక్ స్టేడియంలో లక్నో సూపర్ జెయింట్స్ (LSG)తో జరిగిన మ్యాచ్‌లో ఉర్విల్ ఆకాశమే హద్దుగా చెలరేగిపోయారు. కేవలం 13 బంతుల్లోనే హాఫ్ సెంచరీ పూర్తి చేసి, ఐపీఎల్ చరిత్రలో అత్యంత వేగవంతమైన అర్ధ సెంచరీ రికార్డును సమం చేశారు. గతంలో 2023లో యశస్వి జైస్వాల్ 13 బంతుల్లో హాఫ్ సెంచరీ చేయగా, ఇప్పుడు ఉర్విల్ ఆ రికార్డును అందుకున్నారు.

సురేష్ రైనా 12 ఏళ్ల రికార్డు బద్ధలు!

ఈ మెరుపు ఇన్నింగ్స్‌తో చెన్నై సూపర్ కింగ్స్ జట్టు తరపున సురేష్ రైనా పేరిట ఉన్న పాత రికార్డును ఉర్విల్ చెరిపివేశారు. 2014లో కింగ్స్ ఎలెవన్ పంజాబ్‌పై రైనా 16 బంతుల్లో హాఫ్ సెంచరీ చేయగా, ఇప్పుడు ఉర్విల్ కేవలం 13 బంతుల్లోనే ఆ మార్కును చేరి సిఎస్‌కే చరిత్రలో సరికొత్త రికార్డు నెలకొల్పారు.

అబ్రహం డివిలియర్స్ రికార్డు కూడా క్లీన్ స్వీప్!

కేవలం వేగవంతమైన హాఫ్ సెంచరీ మాత్రమే కాదు, తొలి 10 బంతుల్లోనే అత్యధిక పరుగులు చేసిన ఆటగాడిగా కూడా ఉర్విల్ నిలిచారు. తన ఇన్నింగ్స్ మొదలుపెట్టిన మొదటి 10 బంతుల్లోనే 42 పరుగులు సాధించి, గతంలో ఏబీ డివిలియర్స్ (41 పరుగులు) పేరిట ఉన్న రికార్డును అధిగమించారు. అంతేకాకుండా, ఐపీఎల్ చరిత్రలో ఎదుర్కొన్న మొదటి 8 బంతుల్లోనే 6 సిక్సర్లు బాదిన ఏకైక క్రికెటర్‌గా ఉర్విల్ పటేల్ అరుదైన ఘనత సాధించారు.

ఐపీఎల్ చరిత్రలో వేగవంతమైన 50లు (బంతుల వారీగా):

13 బంతులు - యశస్వి జైస్వాల్ (RR), 2023

13 బంతులు - ఉర్విల్ పటేల్ (CSK), 2026

14 బంతులు - కేఎల్ రాహుల్ (PBKS), 2018

14 బంతులు - ప్యాట్ కమిన్స్ (KKR), 2022

14 బంతులు - రొమారియో షెపర్డ్ (RCB), 2025

భారత టీ20 క్రికెట్‌లో ఇప్పటికే అత్యంత వేగవంతమైన సెంచరీ రికార్డును తన ఖాతాలో వేసుకున్న ఉర్విల్, ఇప్పుడు ప్రపంచంలోని అతిపెద్ద లీగ్‌లో కూడా తన విశ్వరూపాన్ని చూపించారు. ఈ ఇన్నింగ్స్‌తో ఆయన రాత్రికి రాత్రే సోషల్ మీడియాలో సెన్సేషన్‌గా మారిపోయారు.