IPL 2026: ఐపీఎల్ చరిత్రను తిరగరాసిన వైభవ్ సూర్యవంశీ.. శుభ్మన్ గిల్ రికార్డు బద్దలు!
శుభ్మన్ గిల్ రికార్డు బద్దలు!
IPL 2026: న్యూ చండీగఢ్లో బుధవారం సాయంత్రం జరిగిన ఐపీఎల్ 2026 ఎలిమినేటర్ మ్యాచ్లో రాజస్థాన్ రాయల్స్ యువ సంచలనం, కేవలం 15 ఏళ్ల వైభవ్ సూర్యవంశీ సన్రైజర్స్ హైదరాబాద్ బౌలర్లపై విరుచుకుపడి ఊచకోత కోశాడు. కేవలం 29 బంతుల్లోనే 5 ఫోర్లు, 12 భారీ సిక్సర్లతో 97 పరుగులు చేసి విధ్వంసం సృష్టించాడు. ఈ క్రమంలో ఐపీఎల్ ప్లేఆఫ్స్ మ్యాచ్ల్లో ఒకే ఇన్నింగ్స్లో అత్యధిక సిక్సర్లు కొట్టిన ఆటగాడిగా గుజరాత్ టైటాన్స్ కెప్టెన్ శుభ్మన్ గిల్ పేరిట ఉన్న రికార్డును వైభవ్ బద్దలు కొట్టాడు. గతంలో 2023 క్వాలిఫైయర్-2 మ్యాచ్లో ముంబై ఇండియన్స్పై గిల్ 10 సిక్సర్లు కొట్టగా, వైభవ్ చాలా సులువుగా ఆ రికార్డును దాటి ఏకంగా 12 సిక్సర్లు బాదాడు.
ఐపీఎల్ నాకౌట్ మ్యాచ్ల్లో రాజస్థాన్ రాయల్స్ జట్టు తరఫున ఒక బ్యాటర్ చేసిన రెండో అత్యధిక వ్యక్తిగత స్కోరుగా వైభవ్ సూర్యవంశీ చేసిన 97 పరుగులు రికార్డుకెక్కాయి. 2022 క్వాలిఫైయర్-2లో రాయల్ ఛాలెంజర్స్ బెంగళూరుపై జోస్ బట్లర్ చేసిన నాటౌట్ 106 పరుగులు ఈ జాబితాలో మొదటి స్థానంలో ఉన్నాయి. అలాగే ఈ అద్భుతమైన ఇన్నింగ్స్తో వైభవ్ ఈ సీజన్లో తన మొత్తం పరుగుల సంఖ్యను 680కి చేర్చాడు. దీని ద్వారా ఐపీఎల్ చరిత్రలోనే ఒకే సీజన్లో అత్యధిక పరుగులు చేసిన అన్క్యాప్డ్ (ఇంకా అంతర్జాతీయ మ్యాచ్లు ఆడని) ప్లేయర్గా వైభవ్ సరికొత్త రికార్డు సృష్టించాడు. అంతకుముందు 2023 సీజన్లో తన సహచర ఆటగాడు యశస్వి జైస్వాల్ చేసిన 624 పరుగుల రికార్డును వైభవ్ అధిగమించాడు.
అయితే ఇంతటి అద్భుతమైన ఇన్నింగ్స్ ఆడిన ఈ యువ ఆటగాడు బుధవారం రాత్రి తృటిలో సెంచరీ చేసే అవకాశాన్ని కోల్పోయాడు. రాజస్థాన్ రాయల్స్ రన్ చేజ్ చేస్తున్న సమయంలో ఎనిమిదో ఓవర్ ఆఖరి బంతికి సన్రైజర్స్ బౌలర్ ప్రఫుల్ హింగే వేసిన షార్ట్ బాల్ను వైభవ్ అప్పర్ కట్ చేయడానికి ప్రయత్నించాడు. కానీ బంతి అనుకున్నంత ఎత్తుకు లేవకపోవడంతో థర్డ్ మ్యాన్ స్థానంలో ఉన్న స్మరన్ రవిచంద్రన్ చేతికి చిక్కి 97 పరుగుల వద్ద వైభవ్ అవుటయ్యాడు. కేవలం 29 బంతుల్లోనే ఈ స్కోరు చేయడంతో, 2013 సీజన్లో క్రిస్ గేల్ కేవలం 30 బంతుల్లోనే చేసిన ఐపీఎల్ ఫాస్టెస్ట్ సెంచరీ రికార్డును అధిగమించే సువర్ణావకాశాన్ని వైభవ్ సూర్యవంశీ కేవలం ఒక్క బంతి తేడాతో చేజార్చుకున్నాడు.
