IPL Auction: మూడేళ్ల తర్వాత భారత్‌కు ఐపీఎల్ వేలం.. ఎక్కడంటే..?

IPL Auction: ఇండియన్ ప్రీమియర్ లీగ్ 20వ సీజన్‌కు సంబంధించి కీలక అప్‌డేట్ వెలువడింది. గత మూడు సీజన్లుగా విదేశీ గడ్డపై జరిగిన ఐపీఎల్ ఆటగాళ్ల వేలం ఎట్టకేలకు తిరిగి స్వదేశానికి చేరుకుంది. ఐపీఎల్ 2027 సీజన్ కోసం జరగనున్న మినీ వేలాన్ని భారతదేశంలోనే నిర్వహించాలని బీసీసీఐ నిర్ణయించింది. ఈ వేలానికి గోవా వేదిక కానుందని ఐపీఎల్ చైర్మన్ అరుణ్ సింగ్ ధుమాల్ అధికారికంగా వెల్లడించారు.

ఎప్పుడు జరగనుంది?

ఐపీఎల్ చైర్మన్ అరుణ్ సింగ్ ధుమాల్ తెలిపిన వివరాల ప్రకారం, డిసెంబర్ 15 నుంచి 16 తేదీల మధ్య ఈ మినీ వేలం నిర్వహించేందుకు సన్నాహాలు చేస్తున్నారు. ఇది మినీ వేలం కావడం వల్ల వేలం ప్రక్రియ మొత్తం కేవలం ఒక్క రోజులోనే పూర్తయ్యే అవకాశం ఉంది.

మూడేళ్ల విదేశీ ప్రయాణానికి ముగింపు

గత మూడు సీజన్లుగా ఐపీఎల్ వేలం దుబాయ్, జెద్దా, అబుదాబి వంటి విదేశీ నగరాల్లో నిర్వహించబడింది. అయితే ఈసారి వేలాన్ని తిరిగి దేశీయంగా నిర్వహించాలని బోర్డు స్పష్టమైన నిర్ణయం తీసుకుంది. డిసెంబర్ సమయంలో దేశంలోని ప్రధాన నగరాల్లో వివాహాల సీజన్ కారణంగా హోటళ్లు, వేదికలకు తీవ్ర కొరత ఉంటుంది. పైగా ఇది పరిమిత స్థాయిలో జరిగే మినీ వేలం కావడంతో అనుకూలమైన పర్యాటక ప్రాంతమైన గోవాను వేదికగా ఎంపిక చేసినట్లు అరుణ్ ధుమాల్ వివరించారు.

ఒక్క రోజే ఎందుకు?

మెగా వేలంలో వందలాది మంది ఆటగాళ్ల కోసం రెండు రోజుల పాటు బిడ్డింగ్ జరుగుతుంది. అయితే మినీ వేలంలో ఫ్రాంచైజీలు ఇప్పటికే తమ వద్ద ఉన్న ప్రధాన ఆటగాళ్లను అట్టిపెట్టుకుని, కేవలం ఖాళీగా ఉన్న పరిమిత స్లాట్లను భర్తీ చేసుకోవాల్సి ఉంటుంది. 10 ఫ్రాంచైజీలు తమ అవసరాలకు తగిన ఆటగాళ్ల కోసం పోటీపడనుండటంతో ఒకే రోజులోనే కోట్లలో బిడ్డింగ్ జరిగే ఈ మినీ వేలం రసవత్తరంగా మారనుంది.