Kolkata Test: దక్షిణాఫ్రికాతో ఈడెన్ గార్డెన్స్‌లో జరుగుతున్న తొలి టెస్టులో టీమిండియా తొలి ఇన్నింగ్స్‌లో 30 పరుగుల స్వల్ప ఆధిక్యాన్ని మాత్రమే సాధించగలిగింది. బౌలర్లు మొదటి రోజు అద్భుతంగా రాణించి ప్రత్యర్థిని తక్కువ స్కోరుకు ఆలౌట్ చేసినా భారత బ్యాటర్లు మాత్రం ఆ అవకాశాన్ని సద్వినియోగం చేసుకోలేకపోయారు. రెండో రోజు ఆటలో భారత జట్టు తొలి ఇన్నింగ్స్‌లో 189 పరుగులకే ఆలౌట్ అయింది.
గిల్‌కు గాయం.. బ్యాటర్ల నిరాశ
భారత ఇన్నింగ్స్‌లో గట్టి ఎదురుదెబ్బ తగిలింది. కెప్టెన్ శుభ్‌మన్ గిల్ మెడ గాయం కారణంగా కేవలం మూడు బంతులు ఆడిన తర్వాత రిటైర్డ్ హర్ట్‌గా మైదానం వీడాడు. ఆ తర్వాత అతను తిరిగి బ్యాటింగ్‌కు రాలేదు.
భారత బ్యాటర్లలో కేఎల్ రాహుల్ (39), వాషింగ్టన్ సుందర్ (29), రిషభ్ పంత్ (27), రవీంద్ర జడేజా (27) వంటి ఆటగాళ్లు మంచి ఆరంభాలు అందుకున్నారు. అయినప్పటికీ, ఎవరూ తమ ఇన్నింగ్స్‌ను భారీ స్కోరుగా మలచలేకపోవడంతో భారత్ తక్కువ స్కోరుకే పరిమితమైంది.
బుమ్రా ఐదు వికెట్లు వృథా
అంతకుముందు తొలి రోజు ఆటలో భారత పేసర్ జస్‌ప్రీత్ బుమ్రా అద్భుతమైన ప్రదర్శన కనబరిచి ఐదు వికెట్లు తీశాడు. బుమ్రా దెబ్బకు దక్షిణాఫ్రికా జట్టు తొలి ఇన్నింగ్స్‌లో కేవలం 159 పరుగులకే కుప్పకూలింది.
బౌలర్లు అందించిన ఈ పటిష్ఠ‌మైన పునాదిని సద్వినియోగం చేసుకోవడంలో బ్యాటర్లు విఫలమయ్యారు. దీంతో భారత్ కేవలం 30 పరుగుల ఆధిక్యంతోనే సరిపెట్టుకోవాల్సి వచ్చింది. ఈ స్వల్ప ఆధిక్యం టెస్టులో ఎంతవరకు ఉపయోగపడుతుందో చూడాలి.
