Lalit Modi: ఆస్తి వివాదంలో లలిత్ మోదీ పేరు.. అది నేను కాదంటూ క్లారిటీ
క్లారిటీ
Lalit Modi: ఐపీఎల్ మాజీ ఛైర్మన్ లలిత్ మోదీకి సంబంధించిన ఓ వార్త ఇప్పుడు తీవ్ర చర్చకు దారితీసింది. ఢిల్లీలోని వసంత్ విహార్ ప్రాంతంలో బీడీఆర్ బిల్డర్స్తో జరిగిన ఆస్తి వివాదంలో లలిత్ మోదీ చిక్కుకున్నారంటూ పలు మీడియా సంస్థలు కథనాలు ప్రచురించాయి. అయితే.. ఆ వివాదంలో ఉన్నది తాను కాదంటూ లలిత్ మోదీ తీవ్ర అసహనం వ్యక్తం చేశారు.
అసలు ఏం జరిగిందంటే.. వసంత్ విహార్లోని పశ్చిమ మార్గ్ 32వ నంబర్ ఆస్తికి సంబంధించి లలిత్ మోదీ, బీడీఆర్ బిల్డర్స్ మధ్య వివాదం కొనసాగుతోంది. ఈ వ్యవహారంపై ఢిల్లీ హైకోర్టులో కూడా న్యాయపరమైన ప్రక్రియ జరిగింది. అయితే కేసులో ఉన్న లలిత్ మోదీ వేరు అని.. తన ఫొటో, తన వివరాలను ఉపయోగించి కొన్ని మీడియా సంస్థలు వార్తలు ప్రచురించాయని ఐపీఎల్ మాజీ ఛైర్మన్ స్పష్టం చేశారు.
సోషల్ మీడియాలో స్పందించిన లలిత్ మోదీ.. ‘‘వసంత్ విహార్, బీడీఆర్ బిల్డర్స్ ఆస్తి వివాదంలో ఉన్న లలిత్ మోదీని నేను కాదు’’ అని స్పష్టం చేశారు. కోర్టు పత్రాల్లో ఉన్న వివరాల ప్రకారం.. ఆ వ్యక్తి తండ్రి పేరు జేఆర్ మోదీ అని, ఢిల్లీలోని వసంత్ విహార్ ప్రాంతానికి చెందిన వ్యక్తి అని తెలిపారు.
తాను ఎవరో కూడా లలిత్ మోదీ మరోసారి స్పష్టంగా చెప్పుకున్నారు. ‘‘నేను లలిత్ మోదీని.. ఐపీఎల్ వ్యవస్థాపకుడిని’’ అంటూ మీడియా సంస్థలు తమ కథనాలను సరిదిద్దుకోవాలని విజ్ఞప్తి చేశారు. తన ఫొటోను ఉపయోగించడం వల్ల ప్రజల్లో తప్పుడు అభిప్రాయం ఏర్పడే అవకాశం ఉందని ఆయన ఆవేదన వ్యక్తం చేశారు.
అయితే ఈ వివాదానికి సంబంధించి అసలు కోర్టు కేసు మాత్రం వాస్తవమే. ఢిల్లీ హైకోర్టు రికార్డుల ప్రకారం.. 32, పశ్చిమ మార్గ్, వసంత్ విహార్లోని సుమారు 858 చదరపు గజాల ఆస్తికి సంబంధించి లలిత్ మోదీ, బీడీఆర్ బిల్డర్స్ మధ్య ఒప్పంద వివాదం ఏర్పడింది. ఈ కేసులో 2016లో ఆర్బిట్రల్ అవార్డు కూడా వెలువడింది.
తాజాగా 2026 ఆగస్టు 18న ఢిల్లీ హైకోర్టు లలిత్ మోదీ దాఖలు చేసిన అభ్యంతర పిటిషన్ను కొట్టివేసింది. దీంతో బీడీఆర్ బిల్డర్స్ దాఖలు చేసిన ఎగ్జిక్యూషన్ పిటిషన్ ప్రకారం తదుపరి న్యాయ ప్రక్రియ కొనసాగనుంది.
మొత్తానికి.. ఆస్తి వివాదం ఒక లలిత్ మోదీకి సంబంధించినదైతే, వార్తల్లో మాత్రం ఐపీఎల్ మాజీ ఛైర్మన్ లలిత్ మోదీ ఫొటో రావడంతో ఈ గందరగోళం ఏర్పడింది. ఇప్పుడు తనకు సంబంధం లేని కేసులో తన పేరును, ఫొటోను ఉపయోగించడంపై లలిత్ మోదీ వివరణ ఇవ్వడంతో ఈ వ్యవహారం మరోసారి వార్తల్లో నిలిచింది.
