Third ODI Against India: భారత్‌తో మూడో వన్డేకి ముందు న్యూజిలాండ్‌కు భారీ ఎదురుదెబ్బ.. జట్టులో కీలక మార్పులు..
జట్టులో కీలక మార్పులు..
Third ODI Against India: భారత్, న్యూజిలాండ్ జట్ల మధ్య హామిల్టన్ వేదికగా నవంబర్ 10న జరగనున్న మూడో వన్డేకు ముందు ఆతిథ్య కివీస్ జట్టుకు గాయాల బెడద తీవ్ర కలవరపెడుతోంది. కీలక ఆటగాళ్లు గాయాల బారిన పడటంతో కివీస్ జట్టు మేనేజ్‌మెంట్ కీలక మార్పులు చేపట్టింది. పేసర్ బ్లేయర్ టిక్నర్‌కు ప్రత్యామ్నాయంగా క్రిస్టియన్ క్లార్క్‌ను జట్టులోకి పిలిపించడంతో పాటు, పలువురు సీనియర్ ఆటగాళ్ల లభ్యతపై న్యూజిలాండ్ క్రికెట్ తాజా అప్‌డేట్‌లను విడుదల చేసింది.
టిక్నర్‌కు తప్పని 7 రోజుల విశ్రాంతి.. క్రిస్టియన్ క్లార్క్‌కు పిలుపు
రెండో వన్డేలో బ్యాటింగ్ చేస్తున్న సమయంలో కివీస్ ఫాస్ట్ బౌలర్ బ్లేయర్ టిక్నర్ తలకు బంతి బలంగా తగిలింది. ఆ తర్వాత నిర్వహించిన వైద్య పరీక్షల్లో అతనికి కంకషన్ ముప్పు తప్పినప్పటికీ, ఐసీసీ నిబంధనల ప్రకారం కంకషన్ అనుమానిత ప్రోటోకాల్ కింద తప్పనిసరిగా 7 రోజుల స్టాండ్ డౌన్ పీరియడ్ పాటించాల్సి ఉంటుంది. ఈ గడువు మ్యాచ్ జరిగిన రోజు నుంచే లెక్కించనుండటంతో, మూడో వన్డేకు టిక్నర్ కవర్ ఆటగాడిగా యువ పేసర్ క్రిస్టియన్ క్లార్క్‌ను న్యూజిలాండ్ జట్టులోకి చేర్చారు.
ఫెర్గూసన్ దూరం.. మిగిలిన వన్డేలకూ అందుబాటులో లేనట్లే!
స్పీడ్‌స్టర్ లాకీ ఫెర్గూసన్ పూర్తిస్థాయి ఫిట్‌నెస్ సాధించకపోవడంతో భారత్‌తో జరిగే నాలుగు, ఐదో వన్డేల నుంచి పూర్తిగా తప్పుకున్నాడు. అంతకుముందు జరిగిన టీ20 సిరీస్ సందర్భంగా అతని కుడి పిక్క కండరానికి స్వల్ప గాయమైంది. ఆ గాయం నుంచి అతను ఇంకా పూర్తిగా కోలుకోకపోవడంతో మిగిలిన సిరీస్‌కు విశ్రాంతినిచ్చినట్లు న్యూజిలాండ్ క్రికెట్ బోర్డు స్పష్టం చేసింది. 4, 5వ వన్డేల కోసం మరో ఇద్దరు ఆటగాళ్లను త్వరలోనే జట్టులో చేర్చనున్నారు.
మారిన హెన్రీ, జేమీసన్ ప్రణాళికలు
షెడ్యూల్ ప్రకారం సీనియర్ పేసర్లు మ్యాట్ హెన్రీ, కైల్ జేమీసన్ మూడో వన్డే ముగిసిన వెంటనే టెస్ట్ సన్నాహక క్యాంప్ కోసం వెల్లింగ్టన్‌కు బయలుదేరాల్సి ఉంది. అయితే బౌలింగ్ విభాగంలో గాయాల తీవ్రత దృష్ట్యా, వీరిద్దరూ నాలుగో వన్డే వరకు వన్డే జట్టుతోనే కొనసాగనున్నారు.
టెస్ట్ క్యాంప్‌నకు ఐదుగురు స్టార్ ఆటగాళ్లు
భారత్‌తో త్వరలో జరగనున్న టెస్ట్ సిరీస్ సన్నాహకాల్లో భాగంగా టామ్ లాథమ్, డారిల్ మిచెల్, హెన్రీ నికోల్స్, గ్లెన్ ఫిలిప్స్, నాథన్ స్మిత్ నవంబర్ 11న వెల్లింగ్టన్‌కు బయలుదేరి వెళ్లనున్నారు. భారత్‌తో టెస్ట్ సిరీస్ కోసం న్యూజిలాండ్ జట్టును మరికొద్ది రోజుల్లో అధికారికంగా ప్రకటించనున్నారు.
