National level hockey player Julie Yadav: జాతీయ హాకీ క్రీడాకారిణి దుర్మరణం!

National level hockey player Julie Yadav: జాతీయ స్థాయి హాకీ క్రీడాకారిణి, యువ అథ్లెట్ జూలీ యాదవ్ ఆదివారం ఉదయం లక్నోలో జరిగిన ఘోర రోడ్డు ప్రమాదంలో మరణించారు. కేవలం 23 ఏళ్ల వయసులోనే ఆమె అకాల మరణం చెందడం క్రీడా వర్గాల్లో తీవ్ర విషాదాన్ని నింపింది.లక్నోలోని ఎల్‌డీఏ కాలనీ సెక్టార్-ఐలోని ఎల్‌పీఎస్‌ స్కూల్‌లో స్పోర్ట్స్‌ టీచర్‌గా పనిచేస్తున్న జూలీ యాదవ్, ఆదివారం అక్కడ జరగాల్సిన అంతర్-పాఠశాలల బ్యాడ్మింటన్ ఛాంపియన్‌షిప్‌ పర్యవేక్షణ కోసం ఉదయాన్నే స్కూల్‌కు చేరుకున్నారు. స్కూల్‌కు వచ్చిన తర్వాత తన మొబైల్ ఫోన్ ఇంట్లోనే మర్చిపోయానని గుర్తించారు. దాంతో, తన హోండా షైన్ బైక్‌పై ఫోన్ తీసుకురావడానికి ఇంటికి బయలుదేరారు. మౌదా మోడ్ వద్ద సిలిండర్లు లోడ్ చేసుకుని వేగంగా వస్తున్న ట్రక్కు ఆమె బైక్‌ను అత్యంత వేగంగా ఢీకొట్టింది. ఆ ధాటికి జూలీ రోడ్డుపై పడిపోగా, ట్రక్కు చక్రాలు ఆమె శరీరంపై నుంచి వెళ్లినట్లు ప్రత్యక్ష సాక్షులు తెలిపారు. స్థానికులు వెంటనే అంబులెన్స్‌కు సమాచారం ఇచ్చి ఆమెను ట్రామా సెంటర్‌కు తరలించారు. అయితే, అప్పటికే ఆమె మృతి చెందినట్లు వైద్యులు ధ్రువీకరించారు. ఈ ఘటన అనంతరం ట్రక్కు డ్రైవర్ వాహనాన్ని అక్కడే వదిలి పరారయ్యాడు. జూలీ యాదవ్ మరణ వార్త తెలుసుకున్న ఆమె తల్లిదండ్రులు అజయ్ యాదవ్ మరియు కుటుంబ సభ్యులు శోకసంద్రంలో మునిగిపోయారు. ఆమె స్వగ్రామం మౌదా లో కూడా విషాద ఛాయలు అలుముకున్నాయి. పరారైన డ్రైవర్‌పై కేసు నమోదు చేసినట్లు స్థానిక పారా పోలీస్ స్టేషన్ అధికారులు తెలిపారు. ట్రక్కును గుర్తించి, నిందితుడిని పట్టుకోవడానికి పరిసర ప్రాంతాల సీసీటీవీ ఫుటేజీని పరిశీలిస్తున్నట్లు పోలీసులు వెల్లడించారు.జూలీ మృతి పట్ల క్రీడా సమాజం సంతాపం వ్యక్తం చేసింది. హాకీ క్రీడలో ఉజ్వల భవిష్యత్తు ఉన్న క్రీడాకారిణిని కోల్పోయామని స్కూల్ ప్రిన్సిపాల్, తోటి ఉపాధ్యాయులు విచారం వ్యక్తం చేశారు.