Spinner Yuzvendra Chahal: టీమ్ ఇండియాను ఓడించడం ఎవరి తరమూ కాదు: యుజ్వేంద్ర చాహల్

Spinner Yuzvendra Chahal: భారత స్టార్ స్పిన్నర్ యుజ్వేంద్ర చాహల్ ప్రస్తుత టీమ్ ఇండియా ఫామ్‌పై ప్రశంసల జల్లు కురిపించారు. 2024 టీ20 ప్రపంచకప్ విజేతగా నిలిచిన భారత జట్టులో సభ్యుడైన చాహల్, ప్రస్తుతం భారత్ మరియు శ్రీలంక వేదికగా జరుగుతున్న ఈ మెగా టోర్నీలో భారత్ ఆడుతున్న తీరుపై తన సంతోషాన్ని వ్యక్తం చేశారు. దేశం తరపున ప్రపంచకప్ ఆడుతున్నప్పుడు అంచనాలు భారీగా ఉంటాయని, అటువంటి క్లిష్ట పరిస్థితులను మన ఆటగాళ్లు ఎంతో ధైర్యంగా ఎదుర్కొంటున్నారని ఆయన కొనియాడారు.

భారత జట్టు ప్రస్తుతం అద్భుతమైన ఫామ్‌లో ఉందని, గత ఎడిషన్‌లో గెలవడంతో పాటు అంతకుముందు జరిగిన ద్వైపాక్షిక సిరీస్‌లలో కూడా ప్రత్యర్థులను చిత్తు చేయడంతో జట్టులో ఆత్మవిశ్వాసం రెట్టింపు అయిందని చాహల్ పేర్కొన్నారు. "ఇదొక చాంపియన్ టీమ్. ఒకవేళ మనం ఓడిపోతే అది మన స్వయంకృతాపరాధం వల్ల జరుగుతుందే తప్ప, వేరే ఏ జట్టూ మనల్ని ఓడించలేదు" అని చాహల్ ధీమా వ్యక్తం చేశారు. బయట నుంచి చూసేవారికి క్రికెట్ సులభంగా అనిపించినా, మైదానంలో ఒత్తిడిని అధిగమించి ఆడటం చాలా కష్టమని ఆయన గుర్తు చేశారు.

కెప్టెన్ సూర్యకుమార్ యాదవ్ గురించి మాట్లాడుతూ.. ప్రపంచకప్‌కు ముందే సూర్య తన ఫామ్‌ను అందుకోవడం జట్టుకు పెద్ద ప్లస్ పాయింట్ అయిందని చాహల్ అన్నారు. ప్రస్తుతం టోర్నీలో అత్యధిక పరుగులు చేసిన టాప్-5 బ్యాటర్లలో సూర్య ఒకరిగా ఉన్నారని, ముఖ్యంగా అమెరికాతో జరిగిన మ్యాచ్‌లో ఆయన ఆడిన ఇన్నింగ్స్ జట్టు క్వాలిఫికేషన్‌కు ఎంతో కీలకంగా మారిందని ప్రశంసించారు. స్ట్రైక్ రేట్ మెయింటైన్ చేస్తూ బ్యాటింగ్ చేయడంలో సూర్య దిట్ట అని, ఆయనకు బౌలింగ్ చేయాలంటే ఏ బౌలర్ అయినా వంద సార్లు ఆలోచించాల్సిందేనని చాహల్ కొనియాడారు. వెస్టిండీస్‌తో జరగబోయే మ్యాచ్ క్వార్టర్ ఫైనల్ లాంటిదని, మనవాళ్లు తప్పక విజయం సాధిస్తారని ఆయన ఆశాభావం వ్యక్తం చేశారు.