Prashant Veer: ఐపీఎల్ 2026 మినీ వేలం యువ ప్రతిభలకు జాక్పాట్ కొట్టింది. అందులో అన్క్యాప్డ్ ఆల్రౌండర్ ప్రశాంత్ వీర్ సంచలనం రేపాడు. కేవలం రూ.30 లక్షల బేస్ ప్రైస్తో వేలంలోకి వచ్చిన ఈ 20 ఏళ్ల యువకుడి కోసం చెన్నై సూపర్ కింగ్స్, లఖ్నవూ, ముంబయి, రాజస్థాన్ జట్లు తీవ్ర పోటీ పడ్డాయి. చివరకు రూ.14.20 కోట్ల భారీ ధరతో సీఎస్కే అతన్ని సొంతం చేసుకుంది. ఈ ధర అన్క్యాప్డ్ ఆటగాళ్లలో రికార్డుగా నిలిచింది. ఉత్తరప్రదేశ్కు చెందిన ప్రశాంత్ వీర్ నేపథ్యం, ప్రతిభ ఏమిటో తెలుసుకుందాం.
యువరాజ్ అభిమాని నుంచి ఐపీఎల్ స్టార్గా..
ఉత్తరప్రదేశ్ అమేఠీ జిల్లా గుజిపూర్ గ్రామంలో జన్మించిన ప్రశాంత్ వీర్ చిన్నప్పటి నుంచే యువరాజ్ సింగ్ ఆటను చూసి ప్రేరణ పొందాడు. యువీలా దూకుడుగా బ్యాటింగ్ చేయాలని, ఒకరోజు భారత జట్టు తరఫున ఆడాలని కలలు కన్నాడు. ఎడమచేతి వాటం బ్యాటర్, స్లో లెఫ్ట్ ఆర్మ్ స్పిన్ బౌలర్గా ఎదిగాడు. రవీంద్ర జడేజాతో పోల్చదగిన నైపుణ్యాలు అతనివి – లోయర్ ఆర్డర్లో విధ్వంసకర బ్యాటింగ్, ఎకానమికల్ బౌలింగ్, అద్భుతమైన ఫీల్డింగ్.
అతని కోచ్, టీమిండియా మాజీ క్రికెటర్ జ్ఞానేంద్ర పాండే మాటల్లోనే – “ప్రశాంత్లో జడేజా శక్తి, సామర్థ్యాలు ఉన్నాయి. క్లిష్ట సమయాల్లో సరైన నిర్ణయాలు తీసుకుని ఆడగలడు.” సీఎస్కే జడేజాను ట్రేడ్ చేసిన తర్వాత ఆ స్థానాన్ని భర్తీ చేయడానికి ప్రశాంత్ను ఎంచుకుంది.
కష్టాల మధ్య కృషి..
ప్రశాంత్ కుటుంబం సామాన్యం. తండ్రి రామేంద్ర త్రిపాఠి మాజీ ఉపాధ్యాయుడు, తల్లి అంజనా త్రిపాఠి గృహిణి. ఇద్దరు సోదరులు, ఒక సోదరి ఉన్నారు. అయిదో తరగతి తర్వాత క్రికెట్ మీద మక్కువ పెరిగింది. పెద్దవాళ్లతో పోటీ పడి ఆడేవాడు. ఎనిమిదో తరగతి నుంచి కోచింగ్ కోసం మెయిన్పురి వెళ్లాడు. రోజుకు 10-12 గంటలు ప్రాక్టీస్ చేస్తూ, సైకిల్ మీద స్టేడియానికి వెళ్లేవాడు. చదువులోనూ రాణించాడు.
ఫస్ట్క్లాస్ క్రికెట్లో 30 వికెట్లు, 780 పరుగులు; అండర్-23లో 94 వికెట్లు తీసిన ఘనత అతనిది. ఇటీవలి సయ్యద్ ముస్తాక్ అలీ ట్రోఫీ, యూపీ టీ20 లీగ్లలో ఆకట్టుకున్న ప్రదర్శనలు ఐపీఎల్ ఫ్రాంచైజీల దృష్టిని ఆకర్షించాయి.
కుటుంబం ఆనందం..
“టీవీలో వేలం చూశాం. కొడుకు ఎంపికైతే చాలనుకున్నాం, డబ్బు గురించి ఆలోచించలేదు” అంటూ తల్లి అంజనా ఆనందం పంచుకున్నారు. తండ్రి, చిన్నాన్న ఎస్.కె. త్రిపాఠి కూడా కృషిని కొనియాడారు.
ప్రశాంత్ వీర్ లాంటి యువ ప్రతిభలు భారత క్రికెట్ భవిష్యత్తును ప్రకాశవంతం చేస్తున్నాయి. సీఎస్కేలో అతని ప్రస్థానం ఎలా ఉంటుందో చూడాలి!
