Prithvi Shaw: పృథ్వీ షాకు బంపర్ ఛాన్స్.. రంజీల్లో మహారాష్ట్ర కెప్టెన్‌గా బాధ్యతలు..

Prithvi Shaw: భారత క్రికెట్ జట్టు యువ ఓపెనర్ పృథ్వీ షాకు దేశవాళీ క్రికెట్‌లో భారీ బాధ్యత దక్కింది. రాబోయే రంజీ ట్రోఫీ సీజన్‌ తొలి మ్యాచ్‌కు మహారాష్ట్ర పురుషుల సీనియర్ జట్టు కెప్టెన్‌గా పృథ్వీ షాను మేనేజ్‌మెంట్ నియమించింది. వ్యక్తిగత జీవితంలో వివాదాలు, మైదానంలో ఫామ్ లేమితో ఇబ్బంది పడుతున్న 26 ఏళ్ల పృథ్వీ షా కెరీర్‌లో ఇది చాలా పెద్ద బ్రేక్. ఢిల్లీలోని పాలమ్ ఎ స్టేడియంలో సర్వీసెస్‌తో జరగనున్న మ్యాచ్‌తో మహారాష్ట్ర తమ రంజీ ప్రయాణాన్ని ప్రారంభించనుంది. ఈ మ్యాచ్‌లో పృథ్వీ షా జట్టును టాస్ వద్ద లీడ్ చేయనున్నాడు.

రుతురాజ్ గైక్వాడ్ లేకపోవడంతోనే ఈ ఛాన్స్

మహారాష్ట్ర రెగ్యులర్ కెప్టెన్ రుతురాజ్ గైక్వాడ్ ఈ తొలి మ్యాచ్‌కు దూరం కావడమే పృథ్వీకి కలిసొచ్చింది. ఆస్ట్రేలియా ఎ తో జరగనున్న మూడు మ్యాచ్‌ల అనధికారిక వన్డే సిరీస్ కోసం ఇండియా ఎ కెప్టెన్‌గా రుతురాజ్ ఎంపికయ్యాడు. ఆ మ్యాచ్‌లు పుదుచ్చేరిలో అక్టోబర్ 6, 9, 11 తేదీల్లో జరగనున్నాయి. అక్టోబర్ 11న మ్యాచ్ ఉండటంతో రుతురాజ్ రంజీ ఓపెనర్‌కు అందుబాటులో ఉండట్లేదు. మరో యువ ఆల్‌రౌండర్ అర్షిన్ కులకర్ణి కూడా ఇండియా ఎ జట్టులోనే ఉన్నాడు. దాంతో అనుభవం ఉన్న పృథ్వీ షాకు జట్టు పగ్గాలు అప్పగించారు.

మహారాష్ట్రకు మారిన తొలి సీజన్‌లోనే దుమ్మురేపి..

ముంబైకి ఆడిన పృథ్వీ షా, 2025-26 సీజన్‌కు ముందే మహారాష్ట్ర జట్టులోకి చేరాడు. కొత్త జట్టులో అడుగుపెట్టిన తొలి సీజన్‌లోనే తన బ్యాట్‌‌తో పరుగుల వరద పారించాడు. కేవలం 7 మ్యాచ్‌ల్లో 11 ఇన్నింగ్స్‌‌లు ఆడి 537 పరుగులు సాధించి, ఆ సీజన్‌లో మహారాష్ట్ర తరఫున అత్యధిక పరుగులు చేసిన బ్యాటర్‌గా నిలిచాడు. ఇప్పుడు అతడి సారథ్యంలో అనికేత్ బావ్నే, విక్కీ ఓస్త్వాల్, రాజ్‌వర్ధన్ హంగర్గేకర్, ముఖేష్ చౌదరి వంటి కీలక ఆటగాళ్లు బరిలోకి దిగనున్నారు.

సారథిగా పృథ్వీ ట్రాక్ రికార్డ్ అద్భుతం

పృథ్వీ షాకు గతంలో కెప్టెన్‌గా అద్భుతమైన ట్రాక్ రికార్డు ఉంది. పృథ్వీ సారథ్యంలోనే భారత్ ఒక్క మ్యాచ్ కూడా ఓడిపోకుండా ప్రపంచ ఛాంపియన్‌గా నిలిచింది. ఫైనల్లో ఆస్ట్రేలియాను 8 వికెట్లతో మట్టికరిపించింది. ముంబైకి నాయకత్వం వహించి ట్రోఫీ అందించాడు. ఆ సీజన్‌లో నాటౌట్ 227 పరుగుల భారీ ఇన్నింగ్స్‌తో కలిపి మొత్తం 827 పరుగులు బాదాడు. ముంబైని ఫైనల్ వరకూ చేర్చాడు.

ఇప్పుడు మహారాష్ట్ర రంజీ జట్టుకు తొలిసారి కెప్టెన్‌గా బాధ్యతలు తీసుకుంటున్న పృథ్వీ షా, ఇటు బ్యాటర్‌‌గా రాణించి అటు జట్టును గెలిపించి మళ్లీ టీమిండియా సెలెక్టర్ల దృష్టిలో పడాలని పట్టుదలతో ఉన్నాడు.