Pujara’s Best XI: పుజారా బెస్ట్ 11లో ధోనీ, రహానేలకే చోటు లేదు

Pujara’s Best XI: భారత మాజీ టెస్టు బ్యాటర్ చతేశ్వర్ పుజారా తన మాజీ సహచరులతో బెస్ట్ ప్లేయింగ్ 11ను ఎంపిక చేశాడు. అయితే ఈ జాబితాలో ఇద్దరు దిగ్గజాలకు మాత్రం చోటు దక్కలేదు. మాజీ కెప్టెన్ ఎంఎస్ ధోనీతో పాటు అజింక్య రహానేల పేర్లను పుజారా పక్కన పెట్టాడు. అలాగే రోహిత్ శర్మకు కూడా ఈ జట్టులో స్థానం ఇవ్వలేదు.

పుజారా తన కెరీర్‌లో 13 ఏళ్ల పాటు భారత జట్టుకు ప్రాతినిధ్యం వహించాడు. 2010లో అంతర్జాతీయ క్రికెట్‌లోకి వచ్చిన అతని ప్రయాణం 2023లో బోర్డర్-గవాస్కర్ ట్రోఫీతో ముగిసింది. ఈ సమయంలో అతను భారత్ తరఫున 103 టెస్టులు, 5 వన్డేలు ఆడాడు. దీంతో తనతో కలిసి ఆడిన ఎంతోమంది స్టార్ క్రికెటర్లలో నుంచి బెస్ట్ 11ను ఎంచుకోవడం అతనికి అంత సులభం కాలేదు.

క్రిక్‌ఇన్ఫో కోసం ఇచ్చిన వీడియోలో పుజారా తన జట్టుకు ఓపెనర్లుగా రాహుల్ ద్రవిడ్, వీరేంద్ర సెహ్వాగ్‌లను ఎంపిక చేశాడు. ఆసక్తికరమైన విషయం ఏమిటంటే.. తనకు ఆదర్శంగా నిలిచిన రాహుల్ ద్రవిడ్‌ను ఓపెనర్‌గా పంపించి, తాను మాత్రం మూడో స్థానంలో బ్యాటింగ్ చేస్తానని చెప్పాడు. పుజారా, ద్రవిడ్ ఇద్దరూ భారత టెస్టు జట్టులో మూడో స్థానంలో ఎక్కువగా బ్యాటింగ్ చేసిన ఆటగాళ్లే.

నాలుగు, ఐదు స్థానాలకు మాత్రం సచిన్ టెండూల్కర్, విరాట్ కోహ్లీలను ఎంచుకోవడం పెద్దగా ఆశ్చర్యం కలిగించలేదు. ఆ తర్వాత ఆరో స్థానంలో అజింక్య రహానేకు బదులుగా వీవీఎస్ లక్ష్మణ్‌ను పుజారా ఎంపిక చేశాడు. పుజారా తన భారత టెస్టు కెరీర్‌లో ఎక్కువ భాగం రహానేతో కలిసి ఆడినప్పటికీ.. తన బెస్ట్ 11లో లక్ష్మణ్‌కే ప్రాధాన్యం ఇచ్చాడు.

వికెట్ కీపర్ స్థానంలో కూడా పుజారా ఆసక్తికరమైన నిర్ణయం తీసుకున్నాడు. ఎంఎస్ ధోనీని కాకుండా రిషభ్ పంత్‌ను ఎంచుకున్నాడు. ముఖ్యంగా ఆస్ట్రేలియాలో పంత్‌తో కలిసి పుజారా ఆడిన అద్భుతమైన భాగస్వామ్యాలను దృష్టిలో పెట్టుకున్నట్లు కనిపిస్తోంది. ఈ జట్టు ఎంపిక విధానం చూస్తే, పుజారా ప్రధానంగా టెస్టు జట్టునే దృష్టిలో పెట్టుకుని ఈ 11 మందిని ఎంపిక చేసినట్లు అర్థమవుతోంది.

బౌలింగ్ విభాగంలో పుజారా భారత క్రికెట్‌లో తన కెరీర్‌లో చూసిన అత్యుత్తమ బౌలర్లను ఎంచుకున్నాడు. స్పిన్నర్లుగా రవీంద్ర జడేజా, రవిచంద్రన్ అశ్విన్‌లకు చోటిచ్చాడు. పేస్ విభాగంలో జస్ప్రీత్ బుమ్రా, మహ్మద్ షమీలను ఎంపిక చేశాడు. అంతేకాదు, పుజారా 12వ ఆటగాడిగా ఇషాంత్ శర్మను కూడా ఎంపిక చేశాడు. పరిస్థితులను బట్టి ముగ్గురు పేసర్లతో ఆడే అవకాశం ఉందని చెప్పాడు. అయితే తన జట్టులో ఫాస్ట్ బౌలింగ్ ఆల్‌రౌండర్‌ను ఎంపిక చేయలేదని, అవసరమైతే హార్దిక్ పాండ్యాను జట్టులోకి తీసుకునే అవకాశం ఉందని పుజారా తెలిపాడు.

“మరో సీమర్‌గా 12వ స్థానంలో ఇషాంత్ శర్మను తీసుకుంటాను. పరిస్థితులను బట్టి ముగ్గురు సీమర్లతో ఆడవచ్చు. ఫాస్ట్ బౌలింగ్ ఆల్‌రౌండర్‌ను నేను జట్టులో పెట్టలేదు. అవసరమైతే హార్దిక్‌ను ఆ జాబితాలోకి తీసుకోవచ్చు” అని పుజారా చెప్పాడు. పుజారా ఎంపిక చేసిన బెస్ట్ 11లో రాహుల్ ద్రవిడ్, వీరేంద్ర సెహ్వాగ్, చతేశ్వర్ పుజారా, సచిన్ టెండూల్కర్, విరాట్ కోహ్లీ, వీవీఎస్ లక్ష్మణ్, రిషభ్ పంత్, రవీంద్ర జడేజా, రవిచంద్రన్ అశ్విన్, జస్ప్రీత్ బుమ్రా, మహ్మద్ షమీ ఉన్నారు.

12వ ఆటగాడు: ఇషాంత్ శర్మ.

ఇలా చూస్తే.. భారత క్రికెట్‌లో ఒక తరం నుంచి మరో తరానికి చెందిన దిగ్గజాలతో పుజారా తన కలల టెస్టు జట్టును రూపొందించాడు. అయితే ధోనీ, రహానే, రోహిత్‌లను ఎంపిక చేయకపోవడం ఇప్పుడు అభిమానుల్లో ఆసక్తికర చర్చకు కారణమవుతోంది.