Cheteshwar Pujara's Prediction: హామిల్టన్‌లో వర్షం దాగుడుమూతలు.. తెరపైకి పుజారా జోస్యం..
పుజారా జోస్యం..
Cheteshwar Pujara's Prediction: హామిల్టన్ వేదికగా భారత్, న్యూజిలాండ్ మధ్య జరగాల్సిన మూడో వన్డే వర్షం కారణంగా పూర్తిగా తుడిచిపెట్టుకుపోయింది. మ్యాచ్ ఆరంభం కోసం అభిమానులు, ఇరు జట్ల ఆటగాళ్లు గంటల తరబడి నిరీక్షించినా వరుణుడు కనికరించలేదు. వాన ఆగుతూ మళ్లీ కురుస్తూ క్రీడాభిమానుల సహనానికి తీవ్ర పరీక్ష పెట్టింది. చివరకు ఒక్క బంతి కూడా పడకుండానే అంపైర్లు మ్యాచ్‌ను అధికారికంగా రద్దు చేశారు. ఈ మ్యాచ్‌లో భారత కెప్టెన్ శుభ్‌మన్ గిల్ టాస్ గెలిచి మొదట ఫీల్డింగ్ ఎంచుకున్నాడు. అయితే టాస్ పూర్తయిన కాసేపటికే మళ్లీ భారీ వర్షం మొదలైంది. గ్రౌండ్ సిబ్బంది మైదానాన్ని సిద్ధం చేయడానికి ఎంత ప్రయత్నించినా, తరచూ కురుస్తున్న జల్లుల కారణంగా ఆట ప్రారంభం కాలేకపోయింది. కనీసం కుదించిన ఓవర్ల మ్యాచ్ కూడా సాధ్యపడకపోవడంతో మ్యాచ్ రద్దు నిర్ణయం తీసుకోక తప్పలేదు.
హామిల్టన్‌లో రెండోసారి వాన దెబ్బ..
హామిల్టన్ వేదికగా భారత్, న్యూజిలాండ్‌ల మధ్య ఇప్పటివరకు 9 వన్డేలు జరగ్గా, వర్షం కారణంగా మ్యాచ్ రద్దు కావడం ఇది రెండోసారి. గతంలో 2022 నవంబర్‌లో ఇదే మైదానంలో జరిగిన పోరు కూడా వాన వల్ల రద్దయింది. అయితే అప్పట్లో కాసేపు ఆట సాగగా, తాజా పోరులో మాత్రం ఒక్క బంతి కూడా పడకపోవడం గమనార్హం.
చేతేశ్వర్ పుజారా జోస్యం నిజమవుతుందా?
హామిల్టన్ వన్డే వర్షార్పణం కావడంతో భారత మాజీ క్రికెటర్ చేతేశ్వర్ పుజారా గతంలో చేసిన అంచనా ఇప్పుడు క్రికెట్ వర్గాల్లో వైరల్‌గా మారింది. ఈ ఐదు వన్డేల సిరీస్‌పై పుజారా విశ్లేషిస్తూ.. "భారత్-న్యూజిలాండ్ వన్డే సిరీస్ 2-2తో డ్రా అవుతుంది.. వర్షం కారణంగా ఒక మ్యాచ్ రద్దవుతుంది" అని ముందే చెప్పారు. పుజారా చెప్పినట్లే ఇప్పుడు ఒక మ్యాచ్ వాన వల్ల రద్దయింది. మరి ఆయన జోస్యం పూర్తిగా నిజమై, న్యూజిలాండ్ పుంజుకుని మిగిలిన రెండు మ్యాచ్‌లను నెగ్గి సిరీస్‌ను 2-2తో సమం చేస్తుందా? లేక టీమ్ ఇండియా తిరుగులేని విజయంతో సిరీస్‌ను కైవసం చేసుకుంటుందా? అన్నది ఆసక్తికరంగా మారింది.
సిరీస్ సమీకరణాలు ఎలా ఉన్నాయి?
ఐదు వన్డేల సిరీస్‌లో భారత్ ఇప్పటికే తొలి రెండు మ్యాచ్‌లను గెలిచి 2-0తో ఆధిక్యంలో కొనసాగుతోంది. సిరీస్ గెలవాలంటే భారత్‌కు మిగిలిన రెండు మ్యాచ్‌ల్లో ఒక్క విజయం చాలు. మరోవైపు స్వదేశంలో వరుసగా 11 వన్డే సిరీస్‌లను గెలిచిన అద్భుతమైన రికార్డు న్యూజిలాండ్‌కు ఉంది. ఆ సిరీస్ విజయ పరంపరను నిలబెట్టుకోవాలన్నా, పరాజయం నుంచి తప్పించుకోవాలన్నా కివీస్ మిగిలిన రెండు వన్డేల్లోనూ తప్పక గెలవాల్సి ఉంటుంది. 2019 తర్వాత స్వదేశంలో న్యూజిలాండ్‌పై మరో వన్డే సిరీస్ నెగ్గాలని పట్టుదలతో ఉన్న భారత్‌ను కివీస్ ఎంతవరకు అడ్డుకుంటుందో చూడాలి.
