Sanju Samson: కేరళ క్రికెటర్ సంజు శాంసన్ ఇటీవల తనను తాను ప్రముఖ మలయాళ నటుడు మోహన్‌లాల్‌తో పోల్చుకుంటూ చేసిన వ్యాఖ్యలు చాలామంది దృష్టిని ఆకర్షించాయి. ఆసియా కప్‌లో బంగ్లాదేశ్‌తో జరిగిన మ్యాచ్‌కి ముందు ఒక ఇంటర్వ్యూలో సంజు ఈ వ్యాఖ్యలు చేశారు. జట్టులో తన పాత్రపై వచ్చిన ప్రశ్నలకు ఆయన ఈ పోలికతో ఆసక్తికరంగా సమాధానం ఇచ్చారు.
సంజు శాంసన్ ఏమన్నారంటే:
మాజీ క్రికెటర్ సంజయ్ మంజ్రేకర్, సంజు శాంసన్‌ను ఉద్దేశించి, "మీరు ఓపెనింగ్ బ్యాట్స్‌మెన్‌గా అద్భుతంగా రాణించారు. మరి ఇప్పుడు మిడిల్ ఆర్డర్‌లో ఎందుకు ఆడుతున్నారు?" అని ప్రశ్నించారు. దీనికి సంజు ఇచ్చిన సమాధానం ఇది:
"ఇటీవల మా నటుడు మోహన్‌లాల్ (లాలెట్టన్) గారికి దేశం నుంచి ఒక పెద్ద అవార్డు వచ్చింది. ఆయన 30-40 సంవత్సరాలుగా నటుడిగా ఉన్నారు. నేను కూడా నా దేశం కోసం గత 10 సంవత్సరాలుగా ఆడుతున్నాను. కాబట్టి, నేను కేవలం 'హీరో' పాత్ర మాత్రమే చేస్తానని చెప్పలేను. నేను 'విలన్', 'జోకర్' పాత్రలు కూడా చేయాలి. జట్టు కోసం నేను ఏ పాత్రలోనైనా ఆడటానికి సిద్ధంగా ఉన్నాను. నేను ఓపెనర్‌గా రాణించాను, కాబట్టి అక్కడే ఆడతాను అని చెప్పడం సరికాదు. నేను మిడిల్ ఆర్డర్‌లో కూడా రాణించాలనుకుంటున్నాను. జట్టుకు అవసరమైనప్పుడు నేను ఏ పాత్రలోనైనా రాణించడానికి ప్రయత్నిస్తాను."
ఈ మాటల ద్వారా, జట్టు అవసరాల మేరకు తన స్థానాన్ని మార్చుకోవడానికి తాను సిద్ధంగా ఉన్నానని సంజు స్పష్టం చేశారు. మోహన్‌లాల్ లాగానే తాను కూడా విభిన్న పాత్రలను పోషించడానికి, జట్టు విజయం కోసం తన వంతు కృషి చేయడానికి సిద్ధంగా ఉన్నానని ఆయన చెప్పారు. సంజు చేసిన ఈ వ్యాలికకు అభిమానుల నుంచి మంచి స్పందన లభించింది.
