Sridhar Appointed as Sri Lanka’s Fielding Coach: శ్రీలంక ఫీల్డింగ్ కోచ్‌గా శ్రీధర్‌.. వరల్డ్ కప్ ముగిసేవరకు..

Sridhar Appointed as Sri Lanka’s Fielding Coach: భారత క్రికెట్ టీమ్ మాజీ ఫీల్డింగ్ కోచ్ ఆర్‌. శ్రీధర్‌కు శ్రీలంక క్రికెట్ బోర్డు కీలక బాధ్యతలు అప్పగించింది. వచ్చే ఏడాది ప్రారంభంలో జరగనున్న ఐసీసీ టి20 ప్రపంచకప్ ముగిసే వరకు శ్రీధర్ శ్రీలంక జట్టు ఫీల్డింగ్ కోచ్‌గా వ్యవహరించనున్నారు. ఈ మేరకు శ్రీలంక క్రికెట్ బుధవారం అధికారిక ప్రకటన విడుదల చేసింది.

2014 నుంచి 2021 వరకు సుదీర్ఘ కాలం పాటు టీమిండియా ఫీల్డింగ్ కోచ్‌గా పనిచేసిన శ్రీధర్‌కు, 300కు పైగా అంతర్జాతీయ మ్యాచ్‌ల అనుభవం ఉంది. కేవలం ప్రపంచకప్‌కే పరిమితం కాకుండా రాబోయే పాకిస్తాన్, ఇంగ్లండ్‌ పర్యటనల్లో కూడా ఆయన శ్రీలంక ఆటగాళ్లకు శిక్షణ ఇవ్వనున్నారు. ఈ ఏడాది ఆరంభంలోనే శ్రీలంకలో 10 రోజుల పాటు ప్రత్యేక ఫీల్డింగ్ క్యాంప్‌ను శ్రీధర్ నిర్వహించారు. అప్పుడే ఆయన పనితీరుపై సంతృప్తి చెందిన బోర్డు, ఇప్పుడు పూర్తిస్థాయి బాధ్యతలు అప్పగించింది. "లంక ఆటగాళ్లు క్యాచ్‌లు పట్టడంలో సహజంగానే చురుకుగా ఉంటారు. వారి శరీర తీరు, నైపుణ్యాలకు అనుగుణంగా ఫీల్డింగ్ ప్రమాణాలు మరింత మెరుగుపరిచేందుకు నా వంతు తోడ్పాటు అందిస్తాను" అని శ్రీధర్ తెలిపారు.

శ్రీలంకకు ఎందుకు అవసరం?

బీసీసీఐ లెవల్-3 అర్హత ఉన్న శ్రీధర్ రాకతో శ్రీలంక జట్టు ఫీల్డింగ్ విభాగంలో మరింత పటిష్ఠం కానుంది. క్లిష్టమైన క్యాచ్‌లను అందుకోవడం, గ్రౌండ్ ఫీల్డింగ్‌లో చురుకుదనం పెంచడం ద్వారా జట్టు ప్రదర్శనను మెరుగుపరచాలని లంక బోర్డు భావిస్తోంది.