T20 World Cup 2026: టీ20 వరల్డ్ కప్లో భాగంగా నిన్న జరిగిన మ్యాచ్లో ఆస్ట్రేలియాపై శ్రీలంక 8 వికెట్ల తేడాతో అద్భుత విజయం సాధించింది. శ్రీలంక ఓపెనర్ పాతుమ్ నిస్సాంక కేవలం 52 బంతుల్లోనే 10 ఫోర్లు, 5 సిక్సర్లతో సెంచరీ (100 నాటౌట్) చేసి జట్టును గెలిపించాడు. ఈ వరల్డ్ కప్లో ఇదే మొదటి సెంచరీ.
తొలుత బ్యాటింగ్ చేసిన ఆస్ట్రేలియాకు ఓపెనర్లు మిచెల్ మార్ష్ (54), ట్రావిస్ హెడ్ (56) అదిరిపోయే ఆరంభాన్ని ఇచ్చారు. వీరిద్దరూ కలిసి తొలి వికెట్కు 8.3 ఓవర్లలోనే 104 పరుగులు జోడించారు. అయితే ఆ తర్వాత శ్రీలంక స్పిన్నర్లు చెలరేగడంతో ఆసీస్ కేవలం 181 పరుగులకే ఆలౌట్ అయింది. శ్రీలంక బౌలర్లలో దుషాన్ హేమంత 3 వికెట్లతో రాణించాడు.
182 పరుగుల భారీ లక్ష్యంతో ఛేధనకు దిగిన శ్రీలంకకు సరైన శుభారంభం దక్కలేదు. ఓపెనర్ కుశాల్ పెరీరా తీవ్రంగా నిరాశ పర్చాడు. కేవలం ఒక్క రన్ మాత్రమే చేసి స్టోయినిస్ బౌలింగ్లో క్యాచ్ ఔట్ అయ్యాడు. అయినప్పటికీ మరో ఓపెనర్ నిస్సాంక తగ్గలేదు. కుశాల్ మెండిస్తో కలిసి ఫోర్లు, సిక్సర్లతో స్కోర్ బోర్డును పరుగులు పెట్టించాడు. ఈ దశలో (51) హాఫ్ సెంచరీ పూర్తి చేసుకున్న కుశాల్ మెండిస్ స్టోయినిస్ బౌలింగ్లో కీపర్ కాన్లీకి చిక్కాడు. అనంతరం పవన్ రాత్నాయక్ (28), నిస్సాంక (100) శ్రీలంకను విజయ తీరాలకు చేర్చారు.
ఈ విజయంతో శ్రీలంక గ్రూప్-బి నుంచి హ్యాట్రిక్ విజయాలతో సూపర్-8 కు అర్హత సాధించింది. జింబాబ్వే చేతిలో ఇప్పటికే ఓడిపోయిన ఆస్ట్రేలియాకు, ఈ ఓటమి పెద్ద దెబ్బ. ఇప్పుడు ఆసీస్ భవితవ్యం ఇతర జట్ల ఫలితాలపై (ముఖ్యంగా జింబాబ్వే vs ఐర్లాండ్ మ్యాచ్పై) ఆధారపడి ఉంది.శ్రీలంక జట్టు ఈ టోర్నీలో ఆడుతున్న తీరు చూస్తుంటే, వారు టైటిల్ రేసులో గట్టి పోటీనిచ్చేలా కనిపిస్తున్నారు.
