T20 World Cup 2026: టీ20 ప్రపంచకప్ 2026లో భాగంగా బుధవారం ఢిల్లీలోని అరుణ్ జైట్లీ స్టేడియంలో జరిగిన గ్రూప్-డి మ్యాచ్లో దక్షిణాఫ్రికా 6 వికెట్ల తేడాతో యూఏఈని చిత్తు చేసింది. ఈ విజయంతో గ్రూప్ దశలో ఆడిన నాలుగు మ్యాచుల్లోనూ గెలిచిన ప్రొటీస్ జట్టు, ఏమాత్రం ఓటమి లేకుండా గర్వంగా సూపర్-8 దశకు చేరుకుంది. తొలుత బ్యాటింగ్ చేసిన యూఏఈ నిర్ణీత 20 ఓవర్లలో 6 వికెట్ల నష్టానికి 122 పరుగులు మాత్రమే చేయగలిగింది. యూఏఈ బ్యాటర్లలో అలీషన్ షరాఫు (45) ఒంటరి పోరాటం చేయగా, దక్షిణాఫ్రికా బౌలర్ కార్బిన్ బోష్ (3/12) అద్భుత స్పెల్తో ప్రత్యర్థి నడ్డి విరిచాడు. అన్రిచ్ నోర్కియా కూడా రెండు వికెట్లు పడగొట్టి యూఏఈని తక్కువ స్కోరుకే పరిమితం చేశారు.123 పరుగుల స్వల్ప లక్ష్యంతో బరిలోకి దిగిన దక్షిణాఫ్రికా, వర్షం కారణంగా కొద్దిసేపు ఆట ఆగిపోయినా ఏమాత్రం తడబడలేదు. కెప్టెన్ ఐడెన్ మార్క్రామ్ కేవలం 11 బంతుల్లోనే 5 ఫోర్లు, ఒక సిక్సర్తో 28 పరుగులు చేసి మెరుపు ఆరంభాన్ని ఇచ్చాడు. ఆ తర్వాత 'బేబీ ఏబీ'గా పిలవబడే యువ సంచలనం డెవాల్డ్ బ్రెవిస్ (36) తనదైన శైలిలో సిక్సర్లతో విరుచుకుపడటంతో ప్రొటీస్ విజయం సులువైంది. ఓపెనర్ ర్యాన్ రికెల్టన్ (30) కూడా వేగంగా ఆడటంతో దక్షిణాఫ్రికా 13.2 ఓవర్లలోనే లక్ష్యాన్ని ఛేదించింది. ఆల్ రౌండ్ ప్రదర్శనతో ఆకట్టుకున్న కార్బిన్ బోష్కు 'ప్లేయర్ ఆఫ్ ది మ్యాచ్' అవార్డు లభించింది. సూపర్-8లో తన తదుపరి మ్యాచ్లో దక్షిణాఫ్రికా ఫిబ్రవరి 22న బలమైన భారత్తో తలపడనుంది.
