Team India Women: రాయ్‌పూర్‌లో టీమిండియా ఉమెన్స్ వీరవిహారం.. జింబాబ్వేపై 53 బంతుల్లోనే చారిత్రక విజయం..
చారిత్రక విజయం..
Team India Women: జింబాబ్వేతో జరిగిన రెండో టీ20 మ్యాచ్‌లో భారత మహిళల క్రికెట్ జట్టు ఆకాశమే హద్దుగా చెలరేగిపోయింది. తొలి పోరులో ఎదురైన ఒడిదుడుకుల నుంచి పాఠాలు నేర్చుకున్న టీమిండియా, రెండో టీ20లో ప్రత్యర్థికి కనీస అవకాశం కూడా ఇవ్వకుండా ఏకపక్ష విజయాన్ని నమోదు చేసింది. పర్యాటక జింబాబ్వే జట్టును కేవలం 102 పరుగులకే కట్టడి చేసిన భారత్.. అనంతరం కేవలం 53 బంతుల్లోనే లక్ష్యాన్ని ఊడ్చేసి సరికొత్త ప్రపంచ రికార్డును నెలకొల్పింది. భారత విజయంలో అరంగేట్ర బౌలర్ నిక్కీ ప్రసాద్, ఓపెనర్లు షఫాలీ వర్మ, స్మృతి మంధాన కీలక పాత్ర పోషించారు.
మొదటి 2 బంతుల్లోనే 2 వికెట్లు.. నిక్కీ ప్రసాద్ సరికొత్త చరిత్ర
ఆదివారం రాయ్‌పూర్‌ వేదికగా జరిగిన ఈ పోరులో టాస్ ఓడి తొలుత బ్యాటింగ్‌కు దిగిన జింబాబ్వేకు భారత బౌలర్లు చుక్కలు చూపించారు. భారత పదునైన బౌలింగ్ దాడి ముందు అనుభవం లేని జింబాబ్వే బ్యాటర్లు నిలబడలేకపోయారు. గత మ్యాచ్‌తో అంతర్జాతీయ అరంగేట్రం చేసిన యువ బౌలర్ నిక్కీ ప్రసాద్, ఈ మ్యాచ్‌లో తొలిసారి బంతిని చేతబట్టి అద్భుతం సృష్టించింది. తను వేసిన మొదటి రెండు బంతుల్లోనే వరుసగా రెండు వికెట్లు పడగొట్టింది. దీంతో అంతర్జాతీయ టీ20ల్లో వేసిన తొలి రెండు బంతుల్లోనే రెండు వికెట్లు తీసిన మొట్టమొదటి భారత క్రికెటర్‌గా నిక్కీ చరిత్ర పుటల్లోకెక్కింది. బౌలర్లందరూ కట్టుదిట్టంగా రాణించడంతో జింబాబ్వే నిర్ణీత ఓవర్లలో 102 పరుగులకే పరిమితమైంది.
షఫాలీ మెరుపు అర్ధశతకం.. మంధాన క్లాసిక్ ఇన్నింగ్స్
103 పరుగుల స్వల్ప లక్ష్యంతో బరిలోకి దిగిన భారత ఓపెనర్లు ఆది నుంచే విరుచుకుపడ్డారు. తొలి మ్యాచ్‌లో కేవలం 19 పరుగులకే 4 కీలక వికెట్లు కోల్పోయిన చేదు జ్ఞాపకాలను చెరిపివేస్తూ, ఈసారి ఓపెనర్లు విధ్వంసం సృష్టించారు. డాషింగ్ ఓపెనర్ షఫాలీ వర్మ (55) జింబాబ్వే బౌలర్లపై విరుచుకుపడుతూ కేవలం 24 బంతుల్లోనే సిక్సర్‌తో తన మెరుపు హాఫ్ సెంచరీని పూర్తి చేసుకుంది. మరోవైపు కెప్టెన్ స్మృతి మంధాన (47 నాటౌట్) ధాటిగా ఆడుతూ షఫాలీతో కలిసి మొదటి వికెట్‌కు 96 పరుగుల భారీ భాగస్వామ్యాన్ని నెలకొల్పింది.
67 బంతులు మిగిలి ఉండగానే ఘన విజయం.. వరల్డ్ రికార్డ్ బ్రేక్
షఫాలీ ఔటైనప్పటికీ, మంధాన మరో ఆరు బంతుల్లోనే లాంఛనాన్ని పూర్తి చేసింది. దీంతో భారత మహిళల జట్టు కేవలం 8.5 ఓవర్లలో ఒక వికెట్ మాత్రమే కోల్పోయి లక్ష్యాన్ని ఛేదించి 9 వికెట్ల తేడాతో ఘన విజయం సాధించింది.
ఇంకా ఏకంగా 67 బంతులు మిగిలి ఉండగానే లక్ష్యాన్ని పూర్తి చేసిన టీమిండియా.. మహిళల అంతర్జాతీయ టీ20 క్రికెట్ చరిత్రలోనే అత్యధిక బంతులు మిగిలి ఉండగా విజయం సాధించిన జట్టుగా సరికొత్త రికార్డును లిఖించింది. ఈ ఏడాది ఆరంభంలో జింబాబ్వేపైనే 65 బంతులు మిగిలి ఉండగా గెలిచిన వెస్టిండీస్ పేరిట ఉన్న ప్రపంచ రికార్డును భారత మహిళల జట్టు తుడిచిపెట్టేసింది. ఈ అద్భుత విజయంతో సిరీస్‌లో భారత్ తన ఆధిపత్యాన్ని స్పష్టంగా చాటుకుంది.
