Former Cricketer Farooq: రోహిత్ కు జోడీగా వన్డేల్లో ఓపెనర్ గా వైభవ్ ను ఆడించాలి: మాజీ క్రికెటర్ ఫారూక్

Former Cricketer Farooq: భారత క్రికెట్‌లో సరికొత్త సంచలనంగా మారిన టీనేజ్ సెన్సేషన్ వైభవ్ సూర్యవంశీపై ప్రశంసల జల్లు కురుస్తోంది. ఇప్పటికే టీ20ల్లోకి అరంగేట్రం చేసి అదరగొట్టిన ఈ 15 ఏళ్ల కుర్రాడిని, ఇప్పుడు వన్డే జట్టులోకి కూడా తీసుకోవాలని భారత మాజీ క్రికెటర్ ఫారూక్ ఇంజనీర్ అభిప్రాయపడ్డారు. భవిష్యత్తులో వైభవ్ టీమిండియాకు అతిపెద్ద ఆశాకిరణంగా మారుతాడని ఆయన ధీమా వ్యక్తం చేశారు.

టీమిండియా వన్డే బ్యాటింగ్ ఆర్డర్‌లో కొన్ని మార్పులు చేస్తే బాగుంటుందని ఫారూక్ ఇంజనీర్ తన అభిప్రాయాలను పంచుకున్నారు. రోహిత్ శర్మకు జోడీగా ఎడమచేతి వాటం బ్యాటరైన వైభవ్ సూర్యవంశీని ఓపెనర్‌గా పంపాలని సూచించారు. శుభ్‌మన్ గిల్ నాలుగో స్థానంలో బ్యాటింగ్‌కు రావాలని పేర్కొన్నారు.

ఈ సందర్భంగా ఫారూక్ ఇంజనీర్ మాట్లాడుతూ.. "శుభ్‌మన్ గిల్ అద్భుతమైన క్లాస్ ప్లేయర్. జట్టులో అతనే అత్యుత్తమ బ్యాటర్. అయితే, గిల్ ఆరంభంలో కాస్త నెమ్మదిగా ఆడుతుంటాడు. వన్డేల్లో ఎడమ, కుడిచేతి వాటం కాంబినేషన్ చాలా ముఖ్యం. వైభవ్ దూకుడుగా ఆడుతుంటే, రోహిత్ శర్మ నాన్-స్ట్రైకింగ్‌లో ఉండి ఇన్నింగ్స్‌ను చక్కదిద్దడానికి అవకాశం ఉంటుంది. వైభవ్ క్రీజులో ఉన్నంతసేపు రోహిత్ పెద్దగా శ్రమించాల్సిన అవసరం ఉండదు. ఇక విరాట్ కోహ్లి మూడో స్థానంలో, గిల్ నాల్గో స్థానంలో వస్తే మన మిడిల్ ఆర్డర్ తిరుగులేని విధంగా మారుతుంది" అని వివరించారు.

సూర్యవంశీని వన్డే జట్టులోకి ఎంపిక చేయడానికి ఇదే సరైన సమయమని ఫారూక్ అభిప్రాయపడ్డారు. అతను నిలకడగా పరుగులు సాధిస్తున్నాడని, ఇన్నింగ్స్‌కు అదిరిపోయే ఆరంభాన్ని ఇస్తే మిగతా బ్యాటర్లకు భారీ స్కోర్లు సాధించడం సులభమవుతుందని చెప్పారు. వెస్టిండీస్ దిగ్గజం వివ్ రిచర్డ్స్ తర్వాత తాను అంతటి గొప్ప బ్యాటింగ్‌ శైలిని వైభవ్‌లోనే చూస్తున్నానని ఆయన కొనియాడారు. మొత్తానికి, ఈ కుర్ర సంచలనంపై మాజీ దిగ్గజాలు ఇస్తున్న మద్దతు చూస్తుంటే, రాబోయే రోజుల్లో వైభవ్ అంతర్జాతీయ క్రికెట్‌లో మరిన్ని సంచలనాలు సృష్టించడం ఖాయంగా కనిపిస్తోంది.