Gautam Gambhir: విజయం వారికే అంకితం: రాహుల్ ద్రవిడ్, లక్ష్మణ్లపై గంభీర్ ప్రశంసలు
రాహుల్ ద్రవిడ్, లక్ష్మణ్లపై గంభీర్ ప్రశంసలు
Gautam Gambhir: టీ20 ప్రపంచకప్ను వరుసగా రెండోసారి ముద్దాడి భారత్ చరిత్ర సృష్టించిన వేళ, టీమిండియా హెడ్ కోచ్ గౌతమ్ గంభీర్ తనదైన శైలిలో స్పందించారు. అహ్మదాబాద్లోని నరేంద్ర మోదీ స్టేడియంలో న్యూజిలాండ్ను 96 పరుగుల తేడాతో చిత్తు చేసిన తర్వాత జరిగిన ప్రెస్ కాన్ఫరెన్స్లో ఆయన ఆసక్తికర వ్యాఖ్యలు చేశారు.
భారత జట్టు సాధించిన ఈ చారిత్రాత్మక విజయాన్ని మాజీ కోచ్ రాహుల్ ద్రవిడ్, వీవీఎస్ లక్ష్మణ్, చీఫ్ సెలెక్టర్ అజిత్ అగార్కర్లకు అంకితం ఇస్తున్నట్లు గౌతమ్ గంభీర్ ప్రకటించారు. "భారత జట్టును ఒక పటిష్టమైన స్థితిలో ఉంచినందుకు రాహుల్ భాయ్కి, అలాగే సెంటర్ ఆఫ్ ఎక్సలెన్స్ (CoE) ద్వారా నైపుణ్యం కలిగిన ఆటగాళ్లను నిరంతరం అందిస్తున్న లక్ష్మణ్కు ఈ ట్రోఫీ అంకితం" అని గంభీర్ పేర్కొన్నారు. కష్టకాలంలో కూడా నిజాయితీతో పనిచేసిన అజిత్ అగార్కర్ను, తనకు అండగా నిలిచిన జై షాను ఆయన ప్రత్యేకంగా అభినందించారు.
ఈ సందర్భంగా గంభీర్ సోషల్ మీడియా విమర్శలపై ఘాటుగా స్పందించారు. "నా జవాబుదారీతనం సోషల్ మీడియాలో ఉండే వ్యక్తులకు కాదు, డ్రెస్సింగ్ రూమ్లో ఉన్న ఆ 30 మందికి మాత్రమే. ఆటగాళ్లే నన్ను ఒక మంచి కోచ్గా తీర్చిదిద్దారు" అని ఆయన స్పష్టం చేశారు. ఓటమి భయం లేకుండా ఆడటమే తమ జట్టు విజయ రహస్యమని, సెమీఫైనల్ మరియు ఫైనల్ వంటి కీలక మ్యాచ్ల్లో 250కి పైగా పరుగులు సాధించడమే తమ సాహసానికి నిదర్శనమని చెప్పారు.
కెప్టెన్ సూర్యకుమార్ యాదవ్పై గంభీర్ ప్రశంసల జల్లు కురిపించారు. సూర్య ఒక కెప్టెన్లా కాకుండా జట్టుకు ఒక తండ్రిలా అండగా నిలుస్తూ తన పనిని సులభతరం చేస్తున్నాడని కొనియాడారు. చివరగా, క్రికెట్ అభిమానులకు మరియు మీడియాకు ఒక విజ్ఞప్తి చేస్తూ.. "వ్యక్తిగత మైలురాళ్లను
వేడుక చేసుకోవడం ఆపేయండి. జట్టు గెలిచే ట్రోఫీలను మాత్రమే సెలబ్రేట్ చేసుకుందాం" అని గంభీర్ పిలుపునిచ్చారు.
