Vijay Hazare Trophy: దేశవాళీ వన్డే టోర్నీ విజయ్ హజారే ట్రోఫీలో టీమిండియా స్టార్ బ్యాటర్లు రోహిత్ శర్మ, విరాట్ కోహ్లీల పునరాగమనం క్రికెట్ ప్రపంచంలో హాట్ టాపిక్గా మారింది. అయితే, తాజాగా ఉత్తరాఖండ్తో జరిగిన మ్యాచ్లో ముంబై తరఫున బరిలోకి దిగిన రోహిత్ శర్మ గోల్డెన్ డకౌట్ (తొలి బంతికే అవుట్) అయి అభిమానులను తీవ్ర నిరాశకు గురిచేశాడు.
జైపూర్ వేదికగా జరిగిన ఈ మ్యాచ్లో టాస్ గెలిచిన ఉత్తరాఖండ్ జట్టు తొలుత బౌలింగ్ ఎంచుకుంది. తొలి మ్యాచ్లోనే విధ్వంసకర సెంచరీ (155 పరుగులు) బాదిన రోహిత్ శర్మ, ఈ మ్యాచ్లో కూడా అదే జోరు కొనసాగిస్తాడని అంతా భావించారు. కానీ, ఉత్తరాఖండ్ బౌలర్ దేవేంద్ర సింగ్ బోరా వేసిన ఇన్నింగ్స్ తొలి ఓవర్ ఆఖరి బంతికే రోహిత్, నగర్కోటి కి క్యాచ్ ఇచ్చి డకౌట్గా వెనుదిరిగాడు. కేవలం రెండు మ్యాచ్లకే అందుబాటులో ఉంటానని చెప్పిన రోహిత్కు ఇదే ఈ టోర్నీలో చివరి మ్యాచ్ కావడం గమనార్హం.
మరోవైపు బెంగళూరులో గుజరాత్తో జరిగిన మ్యాచ్లో ఢిల్లీ తరఫున ఆడుతున్న విరాట్ కోహ్లీ మాత్రం తన ఫామ్ను కొనసాగించాడు. అతను కేవలం 29 బంతుల్లోనే మెరుపు హాఫ్ సెంచరీ సాధించి సత్తా చాటాడు. ఇందులో 11 ఫోర్లు, ఒక సిక్సర్ ఉండటం విశేషం. తొలి మ్యాచ్లో సెంచరీతో ఆకట్టుకున్న కోహ్లీ, రెండో మ్యాచ్లోనూ కీలక ఇన్నింగ్స్ ఆడి తన సన్నద్ధతను చాటుకున్నాడు.
వచ్చే నెలలో న్యూజిలాండ్తో ప్రారంభం కానున్న మూడు వన్డేల సిరీస్కు ముందు సీనియర్ ఆటగాళ్లు దేశవాళీ మ్యాచ్లు ఆడాలని బీసీసీఐ ఆదేశించింది. ఈ నేపథ్యంలోనే రోహిత్, కోహ్లీ దాదాపు ఎనిమిదేళ్ల విరామం తర్వాత విజయ్ హజారే ట్రోఫీలో బరిలోకి దిగారు. రోహిత్ డకౌట్ అయినప్పటికీ, వీరిద్దరూ మ్యాచ్ ప్రాక్టీస్ కోసం ఈ టోర్నీని వేదికగా చేసుకోవడం జట్టు మేనేజ్మెంట్కు సానుకూల అంశం. జనవరి మొదటి వారంలో ప్రకటించబోయే న్యూజిలాండ్ సిరీస్ జట్టులో వీరిద్దరి ప్రదర్శనను సెలక్టర్లు పరిగణనలోకి తీసుకోనున్నారు.
