Women's Premier League (WPL) 2026: బ్యాట్‌తోనే బదులిచ్చిన హర్లీన్: 'రిటైర్డ్ అవుట్' నిర్ణయంపై సంచలన వ్యాఖ్యలు

Women's Premier League (WPL) 2026: మహిళల ప్రీమియర్ లీగ్ 2026లో ముంబై ఇండియన్స్‌పై అద్భుత ఇన్నింగ్స్ ఆడి యూపీ వారియర్స్ జట్టుకు తొలి విజయాన్ని అందించిన హర్లీన్ డియోల్, అంతకుముందు మ్యాచ్‌లో జరిగిన 'రిటైర్డ్ అవుట్' వివాదంపై స్పందించారు. ఢిల్లీ క్యాపిటల్స్‌తో జరిగిన మ్యాచ్‌లో తను 47 పరుగులతో క్రీజులో ఉండగా, జట్టు యాజమాన్యం వ్యూహాత్మకంగా తనను వెనక్కి పిలిపించడం పెద్ద చర్చకు దారితీసింది. ఆ నిర్ణయంపై అభిమానులు, మాజీ క్రికెటర్లు విస్మయం వ్యక్తం చేయగా, హర్లీన్ మాత్రం ముంబైపై 64 పరుగులతో నాటౌట్‌గా నిలిచి తన బ్యాట్‌తోనే సమాధానం చెప్పారు.

మ్యాచ్ అనంతరం తన రిటైర్డ్ అవుట్ నిర్ణయం గురించి మాట్లాడుతూ, హర్లీన్ చాలా హుందాగా స్పందించారు. ఆ విషయంలో ఎక్కువగా ఆలోచించి ఒత్తిడి పెంచుకోవడంలో అర్థం లేదని ఆమె పేర్కొన్నారు. గత మ్యాచ్‌లో తాను బాగానే ఆడుతున్నానని, అయితే క్లో ట్రయాన్ వంటి పవర్ హిట్టర్లు క్రీజులోకి వస్తే జట్టుకు వేగంగా పరుగులు వస్తాయనే ఉద్దేశంతోనే కోచ్ ఆ నిర్ణయం తీసుకున్నారని ఆమె సమర్థించారు. దురదృష్టవశాత్తు ఆ రోజు అది ఫలించలేదని, కానీ ముంబైపై అదే ట్రయాన్ (11 బంతుల్లో 27) అద్భుతంగా ఆడి తనకు సహకరించిందని గుర్తు చేశారు.

ముంబై ఇండియన్స్‌తో జరిగిన మ్యాచ్‌ తనకు ఎంతో ఆత్మవిశ్వాసాన్ని ఇచ్చిందని హర్లీన్ తెలిపారు. గత మ్యాచ్‌లో రిటైర్డ్ అవుట్ అవ్వడం తనను నిరాశ పరచలేదని, పైగా తాను మంచి ఫామ్‌లో ఉన్నాననే నమ్మకాన్ని కలిగించిందని ఆమె అన్నారు. ముంబైపై కేవలం 39 బంతుల్లో 12 ఫోర్ల సాయంతో 64 పరుగులు చేసి ప్లేయర్ ఆఫ్ ది మ్యాచ్‌గా నిలిచిన హర్లీన్, పిచ్ పరిస్థితిని బట్టి కేవలం భారీ షాట్లపై కాకుండా టైమింగ్‌పై దృష్టి పెట్టడం వల్లే ఈ విజయం సాధ్యమైందని వివరించారు.

ముంబై కెప్టెన్ హర్మన్‌ప్రీత్ కౌర్ కూడా హర్లీన్ ఆట తీరును ప్రశంసించారు. గత మ్యాచ్‌లో హర్లీన్‌ను రిటైర్డ్ అవుట్ చేయడం చూసి తాను కూడా ఆశ్చర్యపోయానని, అయితే ఆమె సానుకూల దృక్పథంతో తిరిగి వచ్చి మ్యాచ్ గెలిపించిన తీరు అద్భుతమని కొనియాడారు. యూపీ వారియర్స్ కెప్టెన్ మెగ్ లానింగ్ కూడా హర్లీన్ తన సామర్థ్యాన్ని మరోసారి నిరూపించుకుందని, ఈ విజయం జట్టులో కొత్త ఉత్సాహాన్ని నింపిందని సంతోషం వ్యక్తం చేశారు.