WTC Clash: WTC: అఫ్గానిస్తాన్తో పోరు.. గెలుపే లక్ష్యంగా టీమిండియా!
గెలుపే లక్ష్యంగా టీమిండియా!
WTC Clash: వరల్డ్ టెస్ట్ చాంపియన్షిప్ కీలక మ్యాచ్లకు ముందు.. టీమిండియా తమ లోపాలను సరిచేసుకోవడానికి రెడీ అయిపోయింది. శ్రీలంకతో జరగబోయే టెస్ట్ సిరీస్ కంటే ముందే సరైన కాంబినేషన్ను సెట్ చేసుకోవడమే లక్ష్యంగా.. నేటి నుంచి అఫ్గానిస్తాన్తో జరిగే ఏకైక టెస్ట్ మ్యాచ్లో బరిలోకి దిగుతోంది భారత జట్టు.
గతంలో.. అంటే 2018లో ఇండియాతో జరిగిన టెస్ట్లో అఫ్గాన్ ఘోరంగా ఓడిపోయింది. రెండో రోజు కేవలం లంచ్, టీ విరామాల మధ్యే ఏకంగా 20 వికెట్లు కోల్పోయి.. ఒకే రోజులో మ్యాచ్ను ముగించేసింది. కానీ.. ఇప్పుడు టీమిండియా పరివర్తనా దశలో ఉంది. కొత్త కాంబినేషన్లతో ప్రయోగాలు చేస్తోంది. కాబట్టి.. హష్మతుల్లా షాహిది నేతృత్వంలోని అఫ్గానిస్తాన్ను తక్కువగా అంచనా వేస్తే ప్రమాదం తప్పకపోవచ్చు!
ప్రస్తుతం హెడ్ కోచ్ గౌతమ్ గంభీర్, కెప్టెన్ శుభ్మన్ గిల్ ముందు కొన్ని సవాళ్లు ఉన్నాయి. ముఖ్యంగా మూడో స్థానంలో నమ్మకమైన బ్యాటర్ కోసం సాయి సుదర్శన్, దేవదత్ పడిక్కల్ మధ్య గట్టి పోటీ నడుస్తోంది. అయితే సుదర్శన్కే ఎక్కువ అవకాశాలు ఉంటాయని గౌతీ ఇప్పటికే స్పష్టం చేశాడు. ఇక ఈ మ్యాచ్లో రవీంద్ర జడేజాకు విశ్రాంతి ఇవ్వడంతో.. భవిష్యత్తు ఆల్రౌండర్ కోసం స్లో లెఫ్టార్మ్ బౌలర్ మానవ్ సుతార్, భారీ హిట్టింగ్ చేయగల హర్ష్ దూబే రేసులో ఉన్నారు. వీరిద్దరిలో ఎవరికి ఛాన్స్ దక్కుతుందనేది ఆసక్తికరంగా మారింది.
ఈ మ్యాచ్ కోసం అఫ్గాన్ జట్టు జలాలాబాద్లో ప్రాక్టీస్ క్యాంప్ అయితే పెట్టింది కానీ.. టెస్టుల్లో ఇండియాను ఢీకొట్టడానికి ఈ ప్రాక్టీస్ ఏమాత్రం సరిపోకపోవచ్చు. ఎందుకంటే 2018 నుంచి అఫ్గాన్ కేవలం 11 టెస్ట్లు ఆడితే.. ఇండియా ఏకంగా 67 మ్యాచ్లు ఆడింది. అఫ్గాన్ బ్యాటింగ్ లైన్అప్ మొత్తం చేసిన సెంచరీలు కేవలం 9 మాత్రమే అయితే.. మన ఇండియన్ బ్యాటర్ల సెంచరీల సంఖ్య 39! పైగా విపరీతమైన ఎండ తీవ్రత కూడా ఈ మ్యాచ్పై ప్రభావం చూపించనుంది.
ఈ మ్యాచ్ కొన్ని అరుదైన రికార్డులకు వేదిక కాబోతోంది:
30: టెస్టుల్లో వెయ్యి రన్స్ పూర్తి చేసిన తొలి అఫ్గాన్ బ్యాటర్గా నిలిచేందుకు రహమత్ షాకు ఇంకా 30 పరుగులు కావాలి.
50: టీమిండియా డైనమిక్ కీపర్ రిషబ్ పంత్కు ఇది 50వ టెస్ట్ మ్యాచ్. ధోనీ, కిర్మాణీ తర్వాత ఎక్కువ టెస్టులు ఆడిన భారత కీపర్గా పంత్ రికార్డు సృష్టించబోతున్నాడు.
157: టెస్టుల్లో 3 వేల రన్స్ మైలురాయిని అందుకోవడానికి కెప్టెన్ గిల్కు ఇంకా 157 పరుగులు అవసరం.
