Young Cricketer Ben Austin Dies: ప్రాక్టీస్ సెషన్‌లో తలకు బంతి తగిలి యువ క్రికెటర్ బెన్ ఆస్టిన్ మృతి

Young Cricketer Ben Austin Dies: ఆస్ట్రేలియా క్రికెట్ ప్రపంచంలో పెను విషాదం చోటుచేసుకుంది. మెల్‌బోర్న్‌కు చెందిన 17 ఏళ్ల యువ క్రికెటర్ బెన్ ఆస్టిన్ (Ben Austin) ప్రాక్టీస్ సెషన్‌లో బంతి తలకు/మెడకు తగలడంతో చికిత్స పొందుతూ మరణించాడు. మెల్‌బోర్న్‌లోని ఫెర్న్‌ట్రీ గల్లీ క్రికెట్ క్లబ్ నెట్స్‌లో ఈ ఘటన జరిగింది: బెన్ ఆస్టిన్ బ్యాటింగ్ ప్రాక్టీస్ చేస్తుండగా, బంతి విసిరే వాంగర్ అనే హ్యాండ్-హెల్డ్ పరికరం నుండి వచ్చిన బంతి అతని మెడపై భాగంలో బలంగా తగిలింది. హెల్మెట్ ధరించినప్పటికీ, మెడకు రక్షణగా ఉండే స్టెమ్ గార్డ్ ధరించకపోవడం వల్ల ఈ ప్రమాదం జరిగినట్లు తెలుస్తోంది. తీవ్రంగా గాయపడిన బెన్ వెంటనే కుప్పకూలిపోగా, అత్యవసర సేవలు అతడిని మోనాష్ మెడికల్ సెంటర్ (Monash Medical Centre) కు తరలించారు. అక్కడ లైఫ్ సపోర్ట్‌పై ఉంచినా, గురువారం ఉదయం (అక్టోబర్ 30, 2025) ఆస్టిన్ తుది శ్వాస విడిచాడు. ఆస్టిన్ మరణం పట్ల అతని తండ్రి జేస్ ఆస్టిన్ (Jace Austin) తీవ్ర ఆవేదన వ్యక్తం చేస్తూ, "మా ప్రియమైన బెన్ మరణంతో మేము పూర్తిగా కుంగిపోయాం. క్రికెట్ ఆడుతూ చనిపోయినా, అతను ఇష్టపడే పని చేస్తూనే వెళ్లాడనే చిన్న ఓదార్పు ఉంది" అని తెలిపారు. ఈ ఘటన 2014లో ఆస్ట్రేలియా టెస్ట్ క్రికెటర్ ఫిల్ హ్యూస్ మరణాన్ని గుర్తు చేస్తోంది. హ్యూస్‌ కూడా మెడపై బంతి తగలడంతో మరణించాడు. క్రికెట్ ఆస్ట్రేలియా, క్రికెట్ విక్టోరియా తీవ్ర సంతాపం వ్యక్తం చేశాయి. క్రికెట్ విక్టోరియా సీఈఓ నిక్ కమిన్స్ మాట్లాడుతూ, ఈ విషాదం క్రికెట్ సమాజాన్ని కలచివేసిందని తెలిపారు. బెన్ ఆస్టిన్ జ్ఞాపకార్థం, ఫిల్ హ్యూస్‌కు నివాళులర్పించిన విధంగానే ‘పుట్ యువర్ బ్యాట్స్ ఔట్ ఫర్ బెన్నీ అనే నివాళి కార్యక్రమాన్ని చేపట్టాలని అతని క్లబ్ కోరింది. ఈ విషాద ఘటన క్రికెట్ కమ్యూనిటీలో సురక్షితమైన పరికరాల వాడకం, ముఖ్యంగా ప్రాక్టీస్ సెషన్స్‌లో మెడ రక్షణ గురించి మరోసారి చర్చకు దారితీసింది.