CM Revanth: ఎర్రవల్లి సర్వే నం.325లో 45 ఎకరాలు ‘మిస్సింగ్’.. సమగ్ర సర్వేతో తేల్చాలని సీఎం రేవంత్‌ ఆదేశం

CM Revanth: సిద్దిపేట జిల్లా మర్కూక్‌ మండలం ఎర్రవల్లి గ్రామంలోని సర్వే నంబరు 325లో రికార్డుల్లో ఉన్న భూమికి, వాస్తవంగా ఉన్న భూమికి మధ్య 45 ఎకరాల వ్యత్యాసం ఉందని తేలడంతో ముఖ్యమంత్రి ఎన్‌.రేవంత్‌రెడ్డి అధికారులను కఠినంగా ఆదేశించారు. ఆ భూములు ఎక్కడ ఉన్నాయో సమగ్ర సర్వే నిర్వహించి గుర్తించాలని స్పష్టం చేశారు.

గత నెల 16న శాసనసభలో 22ఏ నిషేధిత భూముల అంశంపై జరిగిన చర్చ సందర్భంగా సర్వే నం.325లో ప్రభుత్వ భూమిని సర్వే చేయాలని సీఎం ఆదేశించిన విషయం తెలిసిందే. దీని మేరకు తొమ్మిది రోజుల పాటు క్షేత్రస్థాయిలో రెవెన్యూ, భూకొలతలు-దస్త్రాల నిర్వహణ శాఖలు సర్వే నిర్వహించాయి. రికార్డుల ప్రకారం ఈ సర్వే నంబరులో 388 (కొన్ని నివేదికల్లో 388.5) ఎకరాలు ఉన్నట్లు నమోదై ఉండగా, తాజా సర్వేలో 343 ఎకరాలు మాత్రమే గుర్తించారు. దీంతో 45 నుంచి 45.5 ఎకరాలు ఆచూకీ లభించకపోవడం గమనార్హం.

మంగళవారం రాత్రి హైదరాబాద్‌లోని మర్రి చెన్నారెడ్డి మానవ వనరుల అభివృద్ధి కేంద్రం బోధీ పెవిలియన్‌లో సీఎం రేవంత్‌రెడ్డి సమీక్ష నిర్వహించారు. ప్రభుత్వ ప్రధాన కార్యదర్శి సంజయ్‌ జాజు, సీఎంవో ముఖ్య కార్యదర్శి శేషాద్రి, భూ అక్రమాలపై విచారణ కమిటీ, ధరణి అక్రమాలపై ఏర్పాటైన కమిటీ సభ్యులు పాల్గొన్నారు. అధికారులు వివరాలు వెల్లడిస్తూ.. సర్వే నం.325 సమీపంలోనే మాజీ ముఖ్యమంత్రి కల్వకుంట్ల చంద్రశేఖర్‌రావు, ఆయన కుటుంబ సభ్యులకు భూములు ఉన్నందున వారికి నోటీసులు జారీ చేసి రికార్డులు సమర్పించాలని చెప్పారు. సీఎం దీనికి స్పందిస్తూ ఎర్రవల్లి, శివారు వెంకటాపురం గ్రామాల్లో సమగ్ర సర్వేకు వెంటనే నోటిఫికేషన్‌ విడుదల చేయాలని ఆదేశించారు. పట్టా భూములపై కూడా అవసరమైతే సంబంధిత యజమానులకు నోటీసులు ఇచ్చి రికార్డులు పరిశీలించాలన్నారు.

గుర్తించే భూమిని స్థానిక అర్హులైన రైతులకు పంపిణీ చేయాలని, అదే స్థలంలో తెలంగాణ ఉద్యమ అమరవీరుల కుటుంబాలకు ‘తెలంగాణ అమరవీరుల కాలనీ’ నిర్మించాలని సీఎం సూచించారు. అమరవీరుల కుటుంబాలకు ఇళ్ల స్థలాలు కేటాయించి అన్ని మౌలిక సదుపాయాలతో అభివృద్ధి చేయాలని, నిర్మాణ బాధ్యతలను గృహనిర్మాణ శాఖకు అప్పగించి వచ్చే జూన్‌ 2లోగా పూర్తి చేయాలని ఆదేశించారు. అదనంగా కొండపాక మండలం వెలికట్ట గ్రామ పరిధిలో ఎసైన్డ్‌, మిషన్‌ భగీరథ భూములు మినహా మిగిలిన భూముల్లో యంగ్‌ ఇండియా ఇంటిగ్రేటెడ్‌ స్కూల్‌తో పాటు ఎడ్యుకేషన్‌ హబ్‌ ఏర్పాటు చేయాలని, మల్లన్నసాగర్‌ నీటిని అనధికారికంగా వినియోగించేవారిపై చర్యలు తీసుకోవాలని కూడా సూచించారు.

సీఎం ఆదేశాల మేరకు సిద్దిపేట జిల్లా కలెక్టర్‌ హైమావతి ఆధ్వర్యంలో గజ్వేల్‌ ఆర్డీవో చంద్రకళ, మర్కూక్‌ తహసీల్దార్‌ సరితతో పాటు రెవెన్యూ అధికారులతో సమావేశం నిర్వహించనున్నారు. ఈ సమావేశంలో వ్యత్యాసానికి కారణాలను చర్చించి మిగిలిన భూమి వివరాలను రికార్డుల ఆధారంగా పరిశీలించనున్నారు.