Agriculture Minister Tummala Nageswara Rao: ఎత్తిపోతల కింద ఎండు తట్టు పంటలు ప్రోత్సహించాలి: ప్రభుత్వం అత్యవసర ప్రణాళిక

Agriculture Minister Tummala Nageswara Rao: ఎల్‌నినో ప్రభావంతో వర్షపాతం తగ్గే అవకాశం ఉన్న నేపథ్యంలో రైతులను రక్షించేందుకు తెలంగాణ ప్రభుత్వం ముందస్తు అత్యవసర ప్రత్యామ్నాయ ప్రణాళికలు రూపొందించింది. వ్యవసాయ శాఖ మంత్రి తుమ్మల నాగేశ్వరరావు ఈ మేరకు స్పష్టమైన సూచనలు ఇచ్చారు.

రేపటి నుంచి (జులై 15) మొదటి దశ అమలు ప్రారంభమవుతుందని, ఈ నెల 15, 30 మరియు ఆగస్టు 15 తేదీల ప్రాతిపదికన మూడు దశల్లో ప్రణాళికలు అమలు చేయనున్నట్లు మంత్రి తెలిపారు. ఇక్రిశాట్‌లో నిర్వహించిన అత్యవసర సమావేశంలో ఈ నిర్ణయాలు తీసుకున్నారు. వ్యవసాయశాఖ కార్యదర్శి సురేంద్రమోహన్‌, వాతావరణ శాఖ, ఉద్యాన శాఖ, విశ్వవిద్యాలయాలు, ఐఐఎంఆర్, ఐఐవోఆర్‌ల అధికారులు, శాస్త్రవేత్తలు ఈ సమావేశంలో పాల్గొన్నారు.

శాస్త్రీయ విధానంతో రైతుల రక్షణ:

ఈ నెలలోనూ వచ్చే నెలలోనూ సాధారణం కంటే తక్కువ వర్షపాతం నమోదయ్యే అవకాశం ఉందని, ప్రాజెక్టుల్లో నీటి నిల్వలు సరిపడని స్థితిలో ఉన్నాయని మంత్రి వివరించారు. దీర్ఘకాలిక పొడి వాతావరణాన్ని దృష్టిలో ఉంచుకొని శాస్త్రీయ పద్ధతిలో చర్యలు తీసుకోవాలని సూచించారు.

ఎత్తిపోతల కింద ఆరుతడి (ఎండు తట్టు) పంటలు ప్రోత్సహించాలి.

భూగర్భజలాలు త్వరగా ఇంకిపోతున్నందున బావులు, బోర్ల కింద చిరుధాన్యాలు మరియు తక్కువ నీటి వినియోగం ఉన్న పంటలు వేయాలి.

వర్షపాతం నమోదై భూమిలో తగినంత తేమ ఏర్పడిన తర్వాత మాత్రమే విత్తనాలు వేయాలి. ఆ తర్వాత ఎరువులు వాడాలి.

మూడు దశలకు సంబంధించి 16.30 లక్షల, 13.82 లక్షల, 12.70 లక్షల క్వింటాళ్ల విత్తనాల అవసరాన్ని గుర్తించి అందుబాటులో ఉంచుతున్నట్లు మంత్రి ప్రకటించారు. ఆగస్టు నెలాఖరు వరకు ప్రతి వారం మండలాల వారీగా సమగ్ర బులెటిన్ విడుదల చేసి, ప్రాజెక్టుల పరీవాహక ప్రాంతాల్లో నీటి స్థితి, సాగునీటి లభ్యత, విద్యుత్ సరఫరా, పంటల పరిస్థితి వంటి వివరాలను రైతులకు తెలియజేస్తారు.

రైతులకు సూచనలు: కలెక్టర్లు, వ్యవసాయాధికారులు శాస్త్రవేత్తల సూచనలను రైతులకు చేర్చి కచ్చితంగా అమలు చేయాలని మంత్రి ఆదేశించారు. ఎలాంటి పరిస్థితినైనా సమర్థవంతంగా ఎదుర్కొని రైతుల నష్టాన్ని తగ్గించేందుకు ప్రభుత్వం సన్నద్ధమైందని తుమ్మల నాగేశ్వరరావు ధీమా వ్యక్తం చేశారు.