AP Deputy CM Pawan Kalyan: జనవరి 3న కొండగట్టు అంజనేయస్వామి ఆలయానికి ఏపీ డిప్యూటీ సీఎం పవన్ కల్యాణ్

రూ.35.19 కోట్ల టీటీడీ నిధులతో ఆలయ అభివృద్ధి పనులకు భూమిపూజ

100 గదుల ధర్మశాల, 2000 మంది సామర్థ్యం గల దీక్షా విరమణ మండపం నిర్మాణం

పవన్‌కు కొండగట్టు అంజన్నపై అచంచల భక్తి

పర్యటన ఏర్పాట్లు పూర్తి

AP Deputy CM Pawan Kalyan: ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కల్యాణ్ శనివారం (జనవరి 3) తెలంగాణలోని ప్రముఖ పుణ్యక్షేత్రం కొండగట్టు శ్రీ ఆంజనేయస్వామి ఆలయాన్ని సందర్శించనున్నారు. గతంలో ఇచ్చిన హామీని నెరవేర్చడంలో భాగంగా ఆలయ అభివృద్ధి కోసం మంజూరైన రూ.35.19 కోట్ల టీటీడీ నిధులతో నిర్మాణ పనులకు భూమిపూజ నిర్వహించనున్నారు. అనంతరం జేఎన్టీయూ క్యాంపస్‌లో అధికారులతో సమీక్ష నిర్వహిస్తారు. ఈ పర్యటన నేపథ్యంలో జిల్లా అధికార యంత్రాంగం అన్ని ఏర్పాట్లను పూర్తి చేసింది.

టీటీడీ నిధులతో భారీ అభివృద్ధి

గత వారాహి యాత్ర సందర్భంగా కొండగట్టుకు వచ్చిన పవన్ కల్యాణ్‌కు స్థానిక ప్రజాప్రతినిధులు, అర్చకులు, అధికారులు ఆలయంలో భక్తులకు అవసరమైన సౌకర్యాల గురించి విన్నవించారు. వారి విజ్ఞప్తికి స్పందించిన పవన్... డిప్యూటీ సీఎం హోదాలో టీటీడీ నుంచి రూ.35.19 కోట్ల నిధులను మంజూరు చేయించారు. ఈ మొత్తంతో భక్తుల సౌకర్యార్థం 100 గదులతో కూడిన ధర్మశాల, ఒకేసారి 2000 మంది భక్తులు మాల విరమణ చేయగలిగే విశాలమైన దీక్షా మండపం తదితర సౌకర్యాల నిర్మాణం చేపట్టనున్నారు.

అంజన్నపై అపార భక్తి

పవన్ కల్యాణ్‌కు కొండగట్టు శ్రీ ఆంజనేయస్వామిపై అపారమైన భక్తి ఉంది. ఇప్పటివరకు నాలుగు సార్లు ఆలయాన్ని దర్శించుకున్నారు. గతంలో ఆలయ పరిసరాల్లో కరెంట్ షాక్‌కు గురైన సంఘటనలో అంజన్న దయవల్ల ప్రాణాలతో బయటపడ్డానని ఆయన పలుమార్లు ప్రస్తావించారు. జనసేన పార్టీ ఆవిర్భావం తర్వాత ఎన్నికల ప్రచారానికి ఉపయోగించిన ‘వారాహి’ రథానికి కొండగట్టులోనే పూజలు చేసి బయలుదేరారు. ఆ రథంలోనే ప్రచారం చేసి ఆయన పోటీ చేసిన అన్ని స్థానాల్లో విజయం సాధించారు.

పర్యటన షెడ్యూల్, ఏర్పాట్లు

హైదరాబాద్ నుంచి హెలికాప్టర్‌లో జేఎన్టీయూ క్యాంపస్‌కు చేరుకున్న పవన్... అక్కడి నుంచి రోడ్డు మార్గంలో ఆలయానికి వెళ్తారు. ప్రత్యేక పూజల అనంతరం ఘాట్ రోడ్డు వద్ద కేటాయించిన స్థలంలో ధర్మశాల నిర్మాణానికి భూమిపూజ చేసి శంకుస్థాపన చేస్తారు. తర్వాత బృందావనం రిసార్ట్‌లో జనసేన నాయకులు, అభిమానులతో సమావేశమవుతారు. ఉదయం 9 గంటల నుంచి మధ్యాహ్నం 2 గంటల వరకు పర్యటన కొనసాగనుంది. ఎండోమెంట్, పోలీసు అధికారులు భద్రత, ఇతర ఏర్పాట్లను పకడ్బందీగా చేశారు. పవన్ కోసం ప్రత్యేక గది కూడా సిద్ధం చేశారు.