Jagga Reddy’s Pledge: సంగారెడ్డి నియోజకవర్గంలో ఇక ఎన్నికల బరిలోకి దిగను.. రాహుల్‌ను అవమానించినట్టు ఫీల్ అయ్యా: జగ్గారెడ్డి శపథం

Jagga Reddy’s Pledge: కాంగ్రెస్ పార్టీ అగ్రనేత రాహుల్ గాంధీని సంగారెడ్డికి ఆహ్వానించి, తన ప్రచారానికి పిలిచి అవమానపరిచినట్టు తాను భావిస్తున్నానని మాజీ ఎమ్మెల్యే జగ్గారెడ్డి ఆవేదన వ్యక్తం చేశారు. తనను గెలిపించాలని రాహుల్ గాంధీ స్వయంగా సంగారెడ్డికి వచ్చి ప్రచారం చేసినా, ఇక్కడి ప్రజలు తనను ఓడించారని ఆయన కన్నీళ్లు పెట్టుకున్నారు. ఈ నేపథ్యంలో, తన జీవితకాలంలో సంగారెడ్డి నియోజకవర్గం నుంచి ఎమ్మెల్యేగా పోటీ చేయబోనని ఆయన శపథం చేశారు. ఇది తన జీవితంలో మరచిపోలేని ఘటన అని ఆయన అన్నారు.

సంగారెడ్డిలోని గంజి మైదానంలో ఇళ్ల స్థలాలు లేని పేదలతో టీజీఐఐసీ చైర్మన్ నిర్మల జగ్గారెడ్డితో కలిసి సమావేశమైన సందర్భంగా జగ్గారెడ్డి ఈ వ్యాఖ్యలు చేశారు. రాహుల్ గాంధీ తన భుజంపై చేయి వేసి, 'జగ్గారెడ్డిని గెలిపించండి' అని ప్రజలను కోరినా, వారు తనను ఓడించడం బాధాకరమని ఆయన పేర్కొన్నారు. తన ఓటమికి పేద ప్రజలు కారణం కాదని, ఇక్కడి మేధావులు, పెద్దలు బాధ్యులని ఆయన ఆరోపించారు.

మరోవైపు, తన భార్య నిర్మల సంగారెడ్డి నుంచి పోటీ చేసినా, తాను అక్కడ ప్రచారానికి కూడా రానని జగ్గారెడ్డి స్పష్టం చేశారు. రాష్ట్రంలో ఎక్కడైనా ప్రచారం చేయడానికి సిద్ధమే కానీ, సంగారెడ్డిలో మాత్రం ఎప్పటికీ పాదం మోపనని ఆయన తేల్చి చెప్పారు. ఈ సమావేశంలో పేదల సమస్యలపై చర్చించిన ఆయన, వారికి న్యాయం జరిగేలా ప్రభుత్వం చర్యలు తీసుకోవాలని కోరారు.

ఈ ఘటన రాజకీయ వర్గాల్లో చర్చనీయాంశంగా మారింది. జగ్గారెడ్డి శపథం సంగారెడ్డి రాజకీయాలపై ఎలాంటి ప్రభావం చూపుతుందో చూడాలి.