Mayor’s Big Move: మేయర్ ధమాకా: ప్రతి డివిజన్‌కు రూ.2 కోట్లు.. హైదరాబాద్ అభివృద్ధికి బూస్ట్!

Mayor’s Big Move: హైదరాబాద్‌లోని వివిధ డివిజన్ల అభివృద్ధి పనులకు ఎదురుచూస్తున్న ప్రజలకు గుడ్ న్యూస్! గ్రేటర్ హైదరాబాద్ మున్సిపల్ కార్పొరేషన్ (జీహెచ్‌ఎంసీ) మేయర్ గద్వాల విజయలక్ష్మీ మంగళవారం (నవంబర్ 25) జరిగిన కౌన్సిల్ సమావేశంలో కీలక ప్రకటన చేశారు. ప్రభుత్వ ఆదేశాల మేరకా ప్రతి డివిజన్‌కు రూ.2 కోట్ల నిధులు కేటాయిస్తున్నట్లు ప్రకటించారు. ఇది మొత్తంగా 150 డివిజన్లకు రూ.300 కోట్ల నిధుల వరదలా పోటెత్తిస్తుంది.

డివిజన్ స్థాయిలో రోడ్లు, డ్రైనేజ్, ఫ్లైఓవర్లు, జంక్షన్ మెరుగుదల వంటి అభివృద్ధి కార్యక్రమాలకు ఈ నిధులు ఉపయోగపడతాయి. మేయర్ అధ్యక్షతన జరిగిన ఈ చివరి కౌన్సిల్ సమావేశంలో మాట్లాడుతూ, ప్రస్తుత పాలకవర్గం పదవీకాలం ముగింపుదశలో ఉందని, రాష్ట్ర ప్రభుత్వ సహకారంతో హైదరాబాద్ అభివృద్ధికి కొత్త దిశనిర్దేశం చేశామని చెప్పారు. "నగర అభివృద్ధికి అందరం కలిసి చేసిన ప్రతి క్షణం నాకు చిరస్మరణీయం. ఈ బాధ్యతను అప్పగించిన ప్రజలు, ప్రభుత్వం, నాతో పనిచేసిన అందరికీ హృదయపూర్వక ధన్యవాదాలు" అని భావోద్వేగంగా వ్యక్తం చేశారు.

గత ఐదేళ్లలో రోడ్లు, డ్రైనేజీ సౌకర్యాలు, ఫ్లైఓవర్లు, జంక్షన్ మెరుగుదలలు వంటి ప్రాథమిక సదుపాయాలను విస్తరించామని మేయర్ తెలిపారు. అంతేకాకుండా, థీమ్ పార్కులు, అర్బన్ ఫారెస్ట్‌ల ద్వారా పచ్చదనం పెంపుకు ప్రత్యేక చర్యలు తీసుకున్నామని చెప్పారు. పేదలు, మధ్యతరగతి ప్రజలు, నిరుద్యోగులు, చిరుద్యోగులకు రూ.5 బ్రేక్‌ఫాస్ట్, మధ్యాహ్న భోజనం అందించడంతో పాటు, స్వయం సహాయక సంఘాల మహిళలకు వడ్డీ లేని రుణాలు కల్పించామని పేర్కొన్నారు.

చివరి సమావేశం సందర్భంగా టీ బ్రేక్ సమయంలో కార్పొరేటర్లతో ఫోటో సెషన్ నిర్వహిస్తామని మేయర్ ప్రకటించారు. 2026 ఫిబ్రవరి 11తో కౌన్సిల్ గడువు ముగుస్తుంది. సమావేశంలో కార్పొరేటర్లు, సిటీ ఎమ్మెల్యేలు, ఎమ్మెల్సీలు, కాంగ్రెస్ ఎమ్మెల్యేలు, బీజేపీ కార్పొరేటర్లు పాల్గొన్నారు. కొత్తగా ఎన్నికైన జూబ్లీహిల్స్ ఎమ్మెల్యే నవీన్ యాదవ్ కూడా హాజరయ్యారు. 95 ప్రశ్నలు, 45 అజెండా అంశాలపై చర్చ జరిగింది.

ఈ నిధుల కేటాయింపు హైదరాబాద్ నగర అభివృద్ధికి మరో మైలురాయిగా మారనుందని, ప్రజల అభ్యర్థనలకు స్పందనగా ఈ చర్య తీసుకున్నామని మేయర్ స్పష్టం చేశారు.