Municipal Elections: మున్సిపల్ ఎన్నికలు: ఆసక్తికరమైన రాజకీయ కూటములు.. విభిన్న పొత్తులు
విభిన్న పొత్తులు
కాంగ్రెస్తోనూ, భారాసతోనూ జతకట్టిన వామపక్ష పార్టీలు
Municipal Elections: రాజకీయ పార్టీల సిద్ధాంతాలు, విధానాలు ఎలాంటివైనా సరే.. నాయకుల ప్రధాన లక్ష్యం మాత్రం రాజకీయ లాభాలు సాధించడం, ఎన్నికల్లో తమ పార్టీని విజయపథంలో నిలబెట్టడం. దీని కోసం అవసరమైతే సిద్ధాంతాలను పక్కనబెట్టి, వ్యతిరేకులతో సైతం సంధి చేసుకోవడానికి వెనుకాడరు. మున్సిపల్ ఎన్నికల్లోనూ ఇదే పరిస్థితి కనిపిస్తోంది. స్థానిక పరిస్థితులు, రాజకీయ అవసరాలకు తగినట్లు పార్టీలు ఎవరితోనైనా పొత్తులు పెట్టుకోవడానికి సిద్ధమవుతున్నాయి. ఉన్నతాధికారులు స్థానిక నేతలకు పూర్తి స్వేచ్ఛ ఇస్తున్నారు. దీంతో అనూహ్యమైన కూటములు, అంతర్గత అవగాహనలు ఏర్పడుతున్నాయి. మున్సిపల్ పోలింగ్ సమీపిస్తుండటంతో ఇలాంటి తాత్కాలిక ఒప్పందాలు ఆచరణలోకి వస్తున్నాయి. ముఖ్యంగా వామపక్షాలు వివిధ ప్రాంతాల్లో వేర్వేరు పార్టీలతో జతకట్టడం గమనార్హం.
ఒకచోట ఒకరితో.. మరోచోట మరొకరితో
కొత్తగూడెం కార్పొరేషన్లో ఎన్నికల తర్వాత మేయర్ పదవి సాధనకు ఒక జాతీయ పార్టీ, ప్రాంతీయ పార్టీల మధ్య అంతర్గత చర్చలు సాగుతున్నాయి. ఈ పార్టీలు ఎన్నికల్లో కలిసి పోటీ చేయకపోయినా, ఫలితాల తర్వాత సహకరించుకోవాలని నిర్ణయించినట్లు సమాచారం. యాదాద్రి భువనగిరి జిల్లా మున్సిపాలిటీలో కూడా ఒక జాతీయ పార్టీ, ప్రాంతీయ పార్టీ అంతర్గత అవగాహనతో ముందుకు సాగుతున్నాయి. అయితే, బహిరంగ పొత్తు మాత్రం ప్రకటించలేదు.
ఉమ్మడి నల్గొండ జిల్లా: భువనగిరి, యాదగిరిగుట్ట, ఆలేరు ప్రాంతాల్లో భారాస.. సీపీఐ, సీపీఎంలతో కలిసి పోటీ చేస్తోంది. చౌటుప్పల్, మిర్యాలగూడ, నల్గొండ కార్పొరేషన్లలో భారాస సీపీఎంతో జట్టు కట్టింది. హుజూర్నగర్లో కాంగ్రెస్.. సీపీఎం, సీపీఐలతో సంధి చేసుకుంది. కోదాడలో సీపీఐ, తెలుగుదేశంతో పొత్తు ఏర్పడింది. సూర్యాపేటలో మాత్రం ఏ పార్టీల మధ్యా పొత్తులు లేవు.
ఉమ్మడి ఖమ్మం: మధిర, ఏదులాపురం, వైరా, సత్తుపల్లి, కల్లూరు మున్సిపాలిటీల్లో సీపీఎం భారాసతో భాగస్వామ్యం కుదుర్చుకుంది. కొత్తగూడెం కార్పొరేషన్లో సీపీఐ తెలుగుదేశంతో కలిసి ముందుకు వెళ్తోంది. కాంగ్రెస్తో సీపీఎం పొత్తు పెట్టుకుంది. అశ్వారావుపేటలో భారాస, తెలుగుదేశం ఒకే బాటలో నడుస్తుండగా.. కాంగ్రెస్, సీపీఐ, సీపీఎం కూటమిగా మారాయి. ఇల్లెందులో భారాస, సీపీఐ, సీపీఎం, న్యూడెమోక్రసీల మధ్య కూటమి ఏర్పాటుకు చర్చలు అంతిమ దశలో ఉన్నాయి. ఇక్కడ కాంగ్రెస్ మాత్రం స్వతంత్రంగా పోటీ చేస్తోంది.
ఉమ్మడి మహబూబ్నగర్: వనపర్తి మున్సిపాలిటీలో భారాస, సీపీఎం.. అమరచింతలో భారాస, సీపీఐల మధ్య పొత్తు ఏర్పడింది. మిగిలిన ప్రాంతాల్లో పార్టీలు స్వతంత్రంగా బరిలోకి దిగుతున్నాయి.
ఉమ్మడి మెదక్ జిల్లాలో చేర్యాల మున్సిపాలిటీలో సీపీఎం, భారాస కలిసి పోటీ చేస్తున్నాయి. ఇతర పురపాలక సంఘాల్లో మాత్రం ఒంటరిగా ముందుకు సాగుతున్నాయి.
