Phone Tapping Case: ఫోన్ ట్యాపింగ్ కేసు: ఆరా మస్తాన్‌ను సిట్ అధికారులు విచారించారు.. కీలక విషయాలు వెలుగులోకి

Phone Tapping Case: తెలంగాణలో సంచలనం రేపిన ఫోన్ ట్యాపింగ్ కేసులో మరో కీలక పరిణామం చోటుచేసుకుంది. ప్రముఖ రాజకీయ విశ్లేషకుడు, ‘ఆరా’ పోల్ స్ట్రాటజీస్ సంస్థ వ్యవస్థాపకుడు ఆరా మస్తాన్‌ను జూబ్లీహిల్స్ పోలీస్ స్టేషన్‌లో శుక్రవారం ప్రత్యేక దర్యాప్తు బృందం (సిట్) విచారించింది. హైదరాబాద్ పోలీస్ కమిషనర్ సజ్జనార్ నేతృత్వంలోని నూతన సిట్ ఈ విచారణను నిర్వహించింది.

విచారణలో 2020 నుంచి ఆరా మస్తాన్ కీలక రాజకీయ నేతలు, ప్రజాప్రతినిధులతో జరిపిన ఫోన్ కాల్స్ రికార్డింగ్స్‌ను సిట్ అధికారులు పరిశీలించారు. ఈ కాల్ డేటా ఆధారంగా ట్యాపింగ్ జరిగిందా, ఎవరి ఆదేశాల మేరకు జరిగిందా అనే అంశాలపై దృష్టి పెట్టారు. గతంలో ఇచ్చిన వాంగ్మూలాలను మరోసారి నిర్ధారించుకునేందుకు అదే ప్రశ్నలు అడిగారు.

విచారణ అనంతరం ఆరా మస్తాన్ మీడియాతో మాట్లాడుతూ.. తనను సిట్ పిలిచిన మేరకు హాజరయ్యానని, అధికారులు అడిగిన ప్రశ్నలకు స్పష్టమైన సమాధానాలు ఇచ్చానని తెలిపారు. 2020 నుంచే తన ఫోన్ ట్యాపింగ్ జరుగుతోందనే అనుమానం ఉందని, ఈ విషయాన్ని సిట్ దృష్టికి తీసుకెళ్లానని పేర్కొన్నారు.

నూతన సిట్ దర్యాప్తు వేగవంతంగా, సమగ్రంగా సాగుతోందని ఆరా మస్తాన్ అభిప్రాయపడ్డారు. ఈ కేసు త్వరలోనే స్పష్టమైన దిశలోకి వస్తుందని ఆశాభావం వ్యక్తం చేశారు. అవసరమైతే మరోసారి విచారణకు హాజరవుతానని, చట్టపరమైన ప్రక్రియకు పూర్తిగా సహకరిస్తానని స్పష్టం చేశారు.

ఈ కేసు రాష్ట్ర రాజకీయాల్లో వ్యక్తిగత గోప్యత, అధికార దుర్వినియోగం అంశాలను లేవనెత్తింది. సిట్ ముమ్మర దర్యాప్తుతో రానున్న రోజుల్లో మరిన్ని కీలక వివరాలు బయటకు వచ్చే అవకాశం ఉందని రాజకీయ వర్గాలు అంచనా వేస్తున్నాయి.