CM Revanth Reddy: అభివృద్ధి బాధ్యత నా భుజాలపై.. పూర్తి సహకారంతో ముందుకు: సీఎం రేవంత్రెడ్డి
పూర్తి సహకారంతో ముందుకు: సీఎం రేవంత్రెడ్డి
CM Revanth Reddy: తెలంగాణ ముఖ్యమంత్రి ఎ. రేవంత్ రెడ్డి మున్సిపల్ ఎన్నికల నేపథ్యంలో ప్రజలకు బలమైన పిలుపు ఇచ్చారు. ప్రతి పురపాలక సంఘం అభివృద్ధికి మాస్టర్ ప్లాన్ తయారు చేసి, ముఖ్యమంత్రిగా మరియు పురపాలక శాఖ మంత్రిగా ఆ బాధ్యతను తానే తీసుకుంటానని ప్రకటించారు. ఈ ఎన్నికల్లో కాంగ్రెస్ పార్టీకి ఓటు వేసి మద్దతు ఇవ్వాలని కోరారు.
సోమవారం జూబ్లీహిల్స్లోని తన నివాసంలో నిర్వహించిన మీడియా సమావేశంలో మరియు చిట్చాట్లో ఆయన మాట్లాడుతూ, గత పాలనలను బేరీజు వేయాలని ప్రజలను కోరారు. "పన్నెండేళ్లుగా కేంద్రంలో అధికారంలో ఉన్న బీజేపీ తెలంగాణకు ఏమీ చేయలేదు. పదేళ్ల బీఆర్ఎస్ పాలన అవినీతితో నిండి ఉంది. రెండేళ్లలో కాంగ్రెస్ ప్రభుత్వం అనేక సంక్షేమ పథకాలు అమలు చేసింది. ఈ విషయాలన్నీ ఆలోచించి, ఏ పార్టీ అభివృద్ధి చేయగలదో నిర్ణయించుకోండి" అని ఆయన అన్నారు.
ప్రజలు సంపూర్ణంగా సహకరిస్తే, ఆశీర్వదిస్తే అన్ని సమస్యలను పరిష్కరిస్తామని హామీ ఇచ్చారు. వచ్చే మూడేళ్లు కాంగ్రెస్ అధికారంలో ఉంటుందని, తర్వాత అసెంబ్లీ ఎన్నికల్లో కూడా రెండోసారి గెలుస్తుందని విశ్వాసం వ్యక్తం చేశారు.
బీజేపీని ఎదుర్కొంటూ, "గల్లీ ఎన్నికలకు మోదీకి ఏం సంబంధం? మున్సిపాలిటీలో పారిశుద్ధ్య సమస్య వస్తే రాష్ట్ర ప్రభుత్వమే తీర్చాలి కదా? ఓట్లు వేయించుకుని సీట్లు తెచ్చుకోవడం తప్ప బీజేపీ తెలంగాణకు ఇచ్చింది ఏమీ లేదు" అని విమర్శించారు.
బీఆర్ఎస్ పార్టీపై తీవ్ర విమర్శలు గుప్పించారు. "పదేళ్ల పాలనలో అవినీతి చేశారు. ఇసుక, గాలి, నీరు, ఇళ్లు.. ఏదీ వదలలేదు. భారాసకు ఓట్లడిగే నైతిక అర్హతే లేదు. హరీశ్ రావు, కేటీఆర్ లాంటి నాయకులు ఇప్పుడు ఏ ముఖంతో ఓట్లు అడుగుతున్నారు? భారాస నెగ్గితే అభివృద్ధికి సహకరిస్తారా? వారి ప్రసంగాలు విషపూరితంగా, విద్వేషంతో ఉన్నాయి" అని ప్రశ్నించారు.
బీసీలకు 42 శాతం రిజర్వేషన్లు అడ్డుకోవడానికి పిటిషన్ వేసిన వ్యక్తికి బీఆర్ఎస్ టికెట్ ఇచ్చిందని, తమ పార్టీ 61 శాతం టికెట్లు బీసీలకు ఇచ్చిందని చెప్పారు. ఇది తమ నిబద్ధత అన్నారు.
ప్రతి మున్సిపాలిటీకి మాస్టర్ ప్లాన్ తీసుకొస్తామని, జనగణన పూర్తయ్యే వరకు జిల్లాల సరిహద్దులు మార్చవద్దని కేంద్రం ఆదేశాలు ఉన్నాయని తెలిపారు. అవసరమైతే కేంద్రంతో కొట్లాడటానికి తమ ప్రభుత్వానికి బయపడటం లేదని, బీఆర్ఎస్ లాగా చీకటి ఒప్పందాలు చేసుకోవాల్సిన అవసరం లేదని స్పష్టం చేశారు.
మున్సిపల్ ఎన్నికల్లో కాంగ్రెస్, బీజేపీ, బీఆర్ఎస్ మధ్య త్రిముఖ పోటీ ఉందని, ఎవరు నిజంగా అభివృద్ధి చేయగలరో ప్రజలు ఆలోచించాలని రేవంత్ రెడ్డి పిలుపునిచ్చారు. ప్రజల మద్దతుతో అభివృద్ధి పథంలో తెలంగాణను నడిపిస్తామని ఆయన ధీమా వ్యక్తం చేశారు.
