Revanth Reddy: అమరవీరుల త్యాగాలను కేసీఆర్ కుటుంబం మర్చిపోయింది.. సిద్దిపేటలో రేవంత్ రెడ్డి విమర్శలు
రేవంత్ రెడ్డి విమర్శలు

Revanth Reddy: తెలంగాణ రాష్ట్ర ముఖ్యమంత్రి రేవంత్ రెడ్డి గురువారం సిద్దిపేటలో జరిగిన బహిరంగ సభలో కేసీఆర్, హరీశ్ రావు కుటుంబంపై తీవ్రంగా విరుచుకుపడ్డారు. తెలంగాణ సాధన కోసం 1200 మంది ఆత్మబలిదానాలు చేసుకున్నారని, ఆ త్యాగం ఫలితంగా రాష్ట్రం ఏర్పడిందని ఆయన గుర్తు చేశారు. అయితే కేసీఆర్ కుటుంబం మాత్రం పంచభూతాలను చెరబట్టి వేల కోట్ల రూపాయల ఆస్తులు పోగుచేసుకుందని ఆరోపించారు.
పదేళ్ల అధికారంలో అమరుల కుటుంబాలను ఏనాడూ ఆదరించలేదని, తమ కుటుంబ సభ్యులకు మాత్రం మంత్రి పదవులు, ఎంపీ, ఎమ్మెల్సీ పదవులు కట్టబెట్టారని విమర్శించారు. భారాసకు గతమే ఉంది, భవిష్యత్తు లేదని, 2034 వరకు ఇందిరమ్మ రాజ్యం కొనసాగుతుందని ధీమా వ్యక్తం చేశారు. సిద్దిపేటలో కూడా కాంగ్రెస్ జెండా ఎగురుతుందని చెప్పారు.
సభకు ముందు సీఎం సిద్దిపేటకు చేరుకోగా మంత్రులు ఘన స్వాగతం పలికారు. మాజీ ప్రధాని ఇందిరాగాంధీ విగ్రహానికి పూలమాలలు వేసి నివాళులు అర్పించారు. పాదయాత్రగా సభాస్థలికి చేరుకున్నారు. రూ.544 కోట్ల అభివృద్ధి పనులకు శంకుస్థాపనలు, ప్రారంభోత్సవాలు చేశారు. రూ.5 లక్షల ఇందిరమ్మ కుటుంబ బీమా పథకాన్ని ప్రారంభించారు.
బహిరంగ సభలో మాట్లాడుతూ, తొలి తెలంగాణ ఉద్యమ నేత మదన్మోహన్ను గుర్తు చేశారు. 1983లో సిద్దిపేటలో కేసీఆర్ను ఓడించిన మదన్మోహన్ పేరును చరిత్ర నుంచి తుడిచిపెట్టాలని కేసీఆర్, హరీశ్ రావు చేయని కుట్రలేదని అన్నారు. సిద్దిపేట మెడికల్ కాలేజీకి మదన్మోహన్ పేరు పెట్టాలని, 24 గంటల్లో జీవో ఇవ్వాలని ఆరోగ్య శాఖ మంత్రి దామోదర్ రాజనర్సింహకు ఆదేశాలు ఇచ్చారు.
యూత్ కాంగ్రెస్లో అవకాశం ఇచ్చినప్పుడు కేసీఆర్ వెన్నుపోటు పొడిచి తెదేపాలో చేరారని, తర్వాత ఎన్టీఆర్ పార్టీకి కూడా అదే చేశారని విమర్శించారు. సిద్దిపేట ఏమైనా వారి జాగీరా అని ప్రశ్నించారు. ఇది అనాథల రాజ్యం కాదని, కాంగ్రెస్ కార్యకర్తలు జెండా ఎగరేయాలని పిలుపునిచ్చారు. టికెట్ ఇచ్చే బాధ్యత తనది, గెలిపించే బాధ్యత కార్యకర్తలదని అన్నారు.
హరీశ్ రావు భారాసలో ఉండరని, భాజపాతో రహస్య మంతనాలు చేస్తున్నారా అని ఎల్లమ్మ తల్లి సాక్షిగా అడిగారు. కేసీఆర్, కేటీఆర్, హరీశ్ రావులకు ఫామ్హౌస్లు, వందల ఎకరాల భూములు ఎలా వచ్చాయని ప్రశ్నించారు. ఉద్యమకారులు ఆలోచించాలని పిలుపునిచ్చారు.
అమరుడు శ్రీకాంతాచారి తల్లి శంకరమ్మను వేదికపై పిలిచి, కేసీఆర్ ఆమెను గుర్తించలేదని చెప్పారు. తాము ఆమెను మహిళా కమిషన్ సభ్యురాలిగా చేశామని గర్వంగా చెప్పారు. నవంబరు 26న కోటి మంది మహిళలకు చిలకపచ్చ చీరలు అందిస్తామని ప్రకటించారు.
కాళేశ్వరం ప్రాజెక్టు విషయంలో హరీశ్ రావును నిలదీశారు. 2014లో సాగునీటి శాఖ మంత్రిగా ఉన్నప్పుడు కట్టిన ప్రాజెక్టు మూడేళ్లలో కూలిపోయిందని, కేసీఆర్ ఆయన్ను పదవి నుంచి తీశారని అన్నారు. కృష్ణా జలాలు 299 టీఎంసీలు చాలని సంతకాలు పెట్టి రైతులకు మరణ శాసనం రాశారని ఆరోపించారు. అసెంబ్లీలో చర్చిద్దాం అని సవాల్ విసిరారు.
తెలంగాణ గడ్డకు అన్యాయం చేయనని, నాలుగు కోట్ల ప్రజలు గుండెల్లో పెట్టుకున్న నేలకు ద్రోహం చేయనని సీఎం స్పష్టం చేశారు. కార్యక్రమంలో మంత్రులు దామోదర్ రాజనర్సింహ, పొన్నం ప్రభాకర్, వివేక్ వెంకటస్వామి, పీసీసీ అధ్యక్షుడు మహేశ్కుమార్ గౌడ్ తదితరులు పాల్గొన్నారు.
ఈ సభలో సీఎం ప్రసంగం రాజకీయ వర్గాల్లో చర్చనీయాంశమైంది. హరీశ్ రావు తరువాత స్పందించి రేవంత్ మాటల్లో వజన్ లేదని, చేతల్లో విజన్ లేదని ఎద్దేవా చేశారు. సిద్దిపేటలో పోటీ చేయాలని సవాల్ విసిరారు. ఈ ఘటన రాష్ట్ర రాజకీయాల్లో కొత్త ఉద్రిక్తతలకు దారితీసే అవకాశం ఉంది.

