K. Keshava Rao: ఉపాధ్యాయుల జీతాల కోతపై ప్రచారాలు తప్పు.. తగ్గించే ఆలోచన లేదు: కె. కేశవరావు

K. Keshava Rao: ఉపాధ్యాయుల జీతాలను తగ్గించే ఉద్దేశం ప్రభుత్వానికి లేదని ప్రభుత్వ సలహాదారు, తెలంగాణ విద్యా విధానం ఛైర్మన్ కె. కేశవరావు స్పష్టం చేశారు. తెలంగాణ విద్యా విధానం-2026 రూపకల్పనలో భాగంగా విద్యా కమిషన్ సమర్పించిన నివేదికలో ఉపాధ్యాయులు, అధ్యాపకుల వేతనాలు ఎక్కువగా ఉన్నాయని, వాటిని సమీక్షించాలని ఒక సబ్ కమిటీ సిఫారసు చేయడం వివాదానికి దారితీసింది. ఈ నేపథ్యంలో సచివాలయంలో బుధవారం విలేకర్లతో మాట్లాడిన కేశవరావు ఈ విషయంపై వివరాలు తెలిపారు.

తెలంగాణ విద్యా విధానం రూపొందించే క్రమంలో 11 విభిన్న అంశాలపై 11 ఉపసంఘాలను ఏర్పాటు చేశామని, మౌలిక వసతులపై సబ్ కమిటీని తెలంగాణ విద్యా కమిషన్ ఛైర్మన్ ఆకునూరి మురళి ఆధ్వర్యంలో ఏర్పాటు చేశామని వివరించారు. "11 సబ్ కమిటీలు సమర్పించిన నివేదికల్లో మురళి నేతృత్వంలోని కమిటీ నివేదిక కేవలం ఒకటి మాత్రమే. అది తుది నివేదిక కాదు. ఉన్నత స్థాయి కమిటీ దీనిని పరిశీలిస్తుంది. ప్రభుత్వం అసెంబ్లీలో చర్చించి తుది నిర్ణయం తీసుకుంటుంది" అని స్పష్టం చేశారు.

ఏప్రిల్ నెలాఖరుకు విద్యా విధానాన్ని ఖరారు చేస్తామని, నివేదికపై ప్రజలు, ఉపాధ్యాయ సంఘాల నుంచి సలహాలు, సూచనలు స్వీకరిస్తామని తెలిపారు. "వచ్చే వారంలో అన్ని ఉపాధ్యాయ సంఘాల ప్రతినిధులను ఆహ్వానించి చర్చిస్తాం" అని కేశవరావు పేర్కొన్నారు. ఈ వివరణతో ఉపాధ్యాయులలో ఉన్న ఆందోళనకు ప్రభుత్వం స్పందించినట్లు కనిపిస్తోంది.