Tata Group: టాటా గ్రూప్ క్రీడా మైదానాల అభివృద్ధికి సిద్ధత.. మూసీ పునరుజ్జీవనంలో భాగస్వామ్యం

Tata Group: తెలంగాణలో క్రీడా మైదానాల అభివృద్ధికి టాటా సమూహం సిద్ధత వ్యక్తం చేసింది. దావోస్‌లో జరుగుతున్న ప్రపంచ ఆర్థిక వేదిక సదస్సులో ముఖ్యమంత్రి ఏ. రేవంత్ రెడ్డి, టాటా గ్రూప్ ఛైర్మన్ ఎన్. చంద్రశేఖరన్ మధ్య బుధవారం కీలక భేటీ జరిగింది. ఈ సమావేశంలో తెలంగాణ రైజింగ్ విజన్-2047, రాష్ట్ర ప్రభుత్వ విధానాలు, పారిశ్రామిక అనుకూల వాతావరణం గురించి సీఎం వివరించారు.

టాటా ఛైర్మన్ చంద్రశేఖరన్ తెలంగాణ ప్రణాళికాబద్ధమైన ఆలోచన విధానాన్ని, భవిష్యత్ దృష్టిని ప్రపంచానికి పరిచయం చేస్తున్న విధానాన్ని అభినందించారు. పెట్టుబడుల కోసం మాత్రమే కాకుండా, రాష్ట్ర అభివృద్ధి దృష్టిని ప్రోత్సహిస్తున్నట్లు పేర్కొన్నారు.

హైదరాబాద్‌లోని ప్రధాన క్రీడా మైదానాలను ప్రపంచ స్థాయి ప్రమాణాలకు తీర్చిదిద్దే ఆలోచనలను ముఖ్యమంత్రి పంచుకున్నారు. దీనిలో భాగస్వామ్యం అయ్యేందుకు, రాష్ట్ర ప్రభుత్వంతో కలిసి పనిచేసేందుకు టాటా గ్రూప్ సిద్ధంగా ఉందని చంద్రశేఖరన్ స్పష్టం చేశారు. దేశంలో ప్రతిభ ఉన్నప్పటికీ, క్రీడల్లో రాణించడానికి తగిన మౌలిక సదుపాయాలు అవసరమని ఆయన అభిప్రాయపడ్డారు.

యువతలో నైపుణ్యాల అభివృద్ధి, 65 ప్రభుత్వ ఐటీఐలను ఆధునిక సాంకేతిక కేంద్రాలుగా మార్చడంలో టాటా టెక్నాలజీస్‌తో కలిసి పనిచేస్తున్నామని సీఎం గుర్తుచేశారు. ప్రభుత్వ పాలిటెక్నిక్ కాలేజీలను స్కిల్ సెంటర్లుగా అభివృద్ధి చేసే ప్రణాళికలు, యంగ్ ఇండియా స్కిల్స్ యూనివర్సిటీ ఏర్పాటు వివరాలు తెలియజేశారు.

యంగ్ ఇండియా స్పోర్ట్స్ యూనివర్సిటీ ఏర్పాటు ఆలోచనలు, 2036 ఒలింపిక్స్‌లో భారత్ పతకాలు సాధించేలా క్రీడా మౌలిక సదుపాయాల అభివృద్ధి లక్ష్యాలను సీఎం వివరించారు.

మూసీ నది పునరుజ్జీవ ప్రాజెక్టు గురించి చర్చ జరిగింది. రాజస్థాన్, మహారాష్ట్రలలో నీటి వనరుల పునరుద్ధరణలో టాటా గ్రూప్ అనుభవాన్ని గుర్తుచేస్తూ, మూసీ అభివృద్ధిలో భాగస్వామిగా పనిచేయడానికి సిద్ధంగా ఉన్నట్లు చంద్రశేఖరన్ తెలిపారు. మూసీ చుట్టూ ఆర్థిక కార్యకలాపాలు పెరిగేలా ప్రణాళికలు రూపొందిస్తున్నామని సీఎం వివరించారు.

రాష్ట్రంలో హోటళ్లు, రిసార్టుల ఏర్పాటుపై చర్చ జరిగింది. మేడారం, వేములవాడ, భద్రాచలం వంటి ఆలయాల ప్రాంతాల్లో హోటళ్లు, శ్రీశైలం రహదారి వెంబడి అంతర్జాతీయ స్థాయి రిసార్ట్ ఏర్పాటుకు టాటా గ్రూప్ ఆసక్తి చూపింది.

ఏఐ డేటా సెంటర్లు, సెమీకండక్టర్, ఈవీ తయారీ రంగాల్లో తెలంగాణలో కొత్త పరిశ్రమలు నెలకొల్పే అవకాశాలపై టాటా ఛైర్మన్ ఆసక్తి వ్యక్తం చేశారు.

ఈ సమావేశంలో మంత్రులు దుద్దిళ్ల శ్రీధర్ బాబు, పొంగులేటి శ్రీనివాస రెడ్డి, ఉన్నతాధికారులు పాల్గొన్నారు.