CNG Automatic Cars: ఇకపై సీఎన్జీ కార్లలోనూ ఆటోమేటిక్ మజా.. లీటరుకు 36 కి.మీ పైగా మైలేజ్ ఇచ్చే టాప్ 5 కార్లు
మైలేజ్ ఇచ్చే టాప్ 5 కార్లు
CNG Automatic Cars: తక్కువ ఖర్చుతో ఆటోమేటిక్ డ్రైవింగ్ సౌకర్యం కోరుకునే వారి కోసం భారతదేశంలో లభిస్తున్న టాప్ 5 సీఎన్జీ కార్లు ఇవే. టాటా మరియు మారుతి బ్రాండ్లకు చెందిన ఈ కార్లు లీటరుకు 36 కి.మీ పైగా మైలేజ్ ఇస్తూ, మెరుగైన బూట్స్పేస్, ఆధునిక ఫీచర్లతో వస్తున్నాయి.
1. టాటా టియాగో ఐసీఎన్జీ ఏఎంటీ
తక్కువ బడ్జెట్లో ఆటోమేటిక్ గేర్బాక్స్తో కూడిన సీఎన్జీ కారు కొనాలనుకునే వారికి టాటా టియాగో ఐసీఎన్జీ ఏఎంటీ ఒక అద్భుతమైన ఎంపికగా నిలుస్తుంది. మార్కెట్లో దీని ప్రారంభ ధర సుమారు రూ. 7.13 లక్షలుగా ఉంది. ఇందులో 1.2-లీటర్ పెట్రోల్ ఇంజిన్తో పాటు 5-స్పీడ్ ఏఎంటీ గేర్ బాక్స్ ఇచ్చారు. దీని మైలేజ్ లీటరుకు సుమారు 28.06 కిలోమీటర్ల వరకు ఉంటుంది. ఈ కారులో ప్రత్యేకమైన టాటా ట్విన్-సిలిండర్ టెక్నాలజీని వాడారు. దీనివల్ల సీఎన్జీ సిలిండర్లు బాడీ కింద అమర్చబడి ఉంటాయి కాబట్టి, లగేజ్ సర్దుకోవడానికి డిగ్గీలో తగినంత స్థలం లభిస్తుంది.
2. మారుతి సుజుకి స్విఫ్ట్ సీఎన్జీ ఏఎంటీ
స్టైలిష్ లుక్, సూపర్ మైలేజ్ కోరుకునే యువత కోసం మారుతి సుజుకి స్విఫ్ట్ సీఎన్జీ ఏఎంటీ మార్కెట్లో అందుబాటులో ఉంది. దీని ప్రారంభ ధర సుమారు రూ.7.92 లక్షలు. ఇందులో అత్యాధునిక 1.2-లీటర్ జెడ్-సిరీస్ ఇంజిన్, ఆటోమేటిక్ గేర్బాక్స్ అమర్చారు. కంపెనీ నివేదికల ప్రకారం ఈ కారు ఏకంగా లీటరుకు 35.34 కి.మీ. వరకు అద్భుతమైన మైలేజ్ ఇస్తుంది. ఇక ఫీచర్ల పరంగా చూస్తే ఇందులో 7-అంగుళాల టచ్స్క్రీన్, వైర్లెస్ ఛార్జింగ్, ఆటోమేటిక్ క్లైమెట్ కంట్రోల్, ప్రయాణికుల రక్షణ కోసం 6 ఎయిర్బ్యాగ్లు వంటి ఆధునిక సౌకర్యాలు లభిస్తాయి.
3. మారుతి సుజుకి బెలెనో సీఎన్జీ ఏఎంటీ
ప్రీమియం హ్యాచ్బ్యాక్ సెగ్మెంట్ను ఇష్టపడేవారికి మారుతి సుజుకి బెలెనో సీఎన్జీ ఏఎంటీ చక్కటి ఆప్షన్. దీని ప్రారంభ ధర సుమారు రూ.8.32 లక్షలుగా నిర్ణయించారు. ఇందులో శక్తివంతమైన 1.2-లీటర్ జెడ్-సిరీస్ ఇంజిన్ లభిస్తుంది, ఇది లీటరుకు దాదాపు 34.47 కి.మీ. మైలేజ్ ఇస్తుందని కంపెనీ పేర్కొంది. కారు లోపలి ఇంటీరియర్ చాలా విశాలంగా ఉండటమే కాకుండా, 9-అంగుళాల పెద్ద టచ్స్క్రీన్, వెంటిలేటెడ్ సీట్లు, వైర్లెస్ ఛార్జర్, టైప్-సి ఛార్జింగ్ పోర్టులు వంటి లగ్జరీ ఫీచర్లు ఇందులో అందించారు. డ్రైవింగ్ సౌకర్యంతో పాటు ఇంటీరియర్ కంఫర్ట్ కోరుకునే వారికి ఇది పర్ఫెక్ట్ కారు.
4. మారుతి సుజుకి డిజైర్ సీఎన్జీ ఏఎంటీ
సెడాన్ కార్లను ఇష్టపడే కుటుంబాల కోసం ప్రత్యేకంగా రూపొందించిన మారుతి సుజుకి డిజైర్ సీఎన్జీ ఏఎంటీ ఈ జాబితాలో అత్యధిక మైలేజ్ ఇచ్చే కారుగా నిలిచింది. దీని ప్రారంభ ధర సుమారు రూ. 8.53 లక్షలు. ఈ కారు లీటరుకు ఏకంగా 36.47 కిలోమీటర్ల మైలేజ్ ఇస్తుందని కంపెనీ నిరూపించింది. ఇందులో టచ్స్క్రీన్ ఇన్ఫోటైన్మెంట్ సిస్టమ్, వెనుక ప్రయాణికుల సౌకర్యం కోసం ప్రత్యేక ఏసీ వెంట్లు, ఆటోమేటిక్ క్లైమేట్ కంట్రోల్,పెద్ద బూట్ స్పేస్ లభిస్తాయి. కుటుంబంతో కలిసి సుదూర ప్రయాణాలు చేసే వారికి ఈ సెడాన్ కారు ఎంతో అనుకూలంగా ఉంటుంది.
5. టాటా పంచ్ ఐసీఎన్జీ ఏఎంటీ
ఎస్యూవీ లుక్, హైట్, రఫ్ అండ్ టఫ్ డ్రైవింగ్ కోరుకునే వారి కోసం టాటా పంచ్ ఐసీఎన్జీ ఏఎంటీ అందుబాటులో ఉంది. దీని ప్రారంభ ధర సుమారు రూ. 8.77 లక్షలుగా ఉంది. టాటా వారి ట్విన్-సిలిండర్ టెక్నాలజీ కారణంగా ఇందులో కూడా సీఎన్జీ ట్యాంక్ ఉన్నప్పటికీ 210 లీటర్ల బూట్స్పేస్ లభిస్తుంది. ఫీచర్ల విషయానికి వస్తే 10.25-అంగుళాల పెద్ద స్క్రీన్, 360-డిగ్రీ కెమెరా, పెడల్ షిఫ్టర్లు, నేరుగా సీఎన్జీ మోడ్లోనే కారును స్టార్ట్ చేసే అద్భుతమైన ఫీచర్ ఇందులో ఇచ్చారు. రోజువారీ సిటీ ట్రాఫిక్లో డ్రైవింగ్ను చాలా సులభతరం చేయడానికి ఈ కారు చక్కగా ఉపయోగపడుతుంది.
