Ram Mohan Naidu Kinjarapu: రాజధాని అంటే వైకాపాకు నవ్వులాటలా.. రామ్మోహన్ నాయుడు తీవ్ర విమర్శలు

Ram Mohan Naidu Kinjarapu: కేంద్ర మంత్రి రామ్మోహన్ నాయుడు వైకాపా పార్టీపై తీవ్రంగా మండిపడ్డారు. అమరావతి రాజధాని విషయంలో వైకాపా అధినేత జగన్ మోహన్ రెడ్డి మూడు ముక్కలాట పూర్తి చేసి, ఇప్పుడు మూడక్షరాల ఆట మొదలుపెట్టారని, రాజధాని అంటే ఆ పార్టీ నేతలకు నవ్వులాటలా మారిందని విరుచుకుపడ్డారు.

తెదేపా జిల్లా కార్యాలయంలో శుక్రవారం విలేకర్లతో మాట్లాడుతూ రామ్మోహన్ నాయుడు ఇలా అన్నారు: “రాష్ట్రానికి శాశ్వత రాజధానిగా అమరావతిని లోక్‌సభలో అన్ని పార్టీలు మద్దతు తెలిపాయి. విభజనకు కారణమైన కాంగ్రెస్ కూడా ఆమోదించింది. కానీ వైకాపా మాత్రం మద్దతు ఇవ్వకుండా వాకౌట్ చేసింది. ఈ విషయంలో ఆ పార్టీ నేతలు చరిత్రలో చెడు పేరు తెచ్చుకుంటారు.”

అమరావతి అభివృద్ధి చేస్తే చంద్రబాబు నాయుడికి పేరు వస్తుందని వైకాపా నేతలు విషం చిమ్ముతున్నారని, రాష్ట్రంపై వారి కక్ష, విధ్వంసం, విషం ఇందుకు స్పష్టమైన ఉదాహరణమని ఆయన ఆరోపించారు. రాష్ట్రాభివృద్ధికి ఏమైనా సహాయం కావాలంటే కేంద్రం సహకరిస్తోందని, కానీ వైకాపా నేతలు మాత్రం రాష్ట్రం నాశనం కావాలని గుంటనక్కల్లా ఎదురుచూస్తున్నారని విమర్శించారు.

కూటమి ప్రభుత్వం ఏర్పడిన తర్వాత అమరావతిని రాజధానిగా ప్రకటించి, రాష్ట్రంలోని అన్ని ప్రాంతాలు సమానంగా అభివృద్ధి చెందాలని భావించామని రామ్మోహన్ నాయుడు తెలిపారు. అందుకు అనుగుణంగా గూగుల్, ఆర్సెలార్ మిత్తల్, బల్క్ డ్రగ్ పార్కు, మూలపేట పోర్టు, విమానాశ్రయాలు, టీసీఎస్, కాగ్నిజెంట్ వంటి ప్రముఖ ప్రాజెక్టులను ఉత్తరాంధ్రకు తీసుకొచ్చి అభివృద్ధి చేస్తున్నామని వివరించారు.

“భోగాపురం విమానాశ్రయాన్ని ప్రధానమంత్రి చేతుల మీదుగా జులై 5న ప్రారంభించాలని యోచిస్తున్నాం” అని రామ్మోహన్ నాయుడు ప్రకటించారు.