Chandrababu Launches Raymond Projects: చంద్రబాబు: ఏపీకి రేమాండ్ ప్రాజెక్టులు.. వర్చువల్‌గా శంకుస్థాపన

 Chandrababu Launches Raymond Projects: ఇన్వెస్టర్స్ మీట్ (సీఐఐ) పెట్టుబడుల సదస్సు రెండో రోజు విశాఖపట్నంలో ఘనంగా జరుగుతోంది. ఈ సదస్సు నుంచి రాష్ట్రానికి మరో గుడ్ న్యూస్ చేరింది. రేమాండ్ గ్రూప్ ప్రాజెక్టులకు ముఖ్యమంత్రి చంద్రబాబు నాయుడు వర్చువల్‌గా శంకుస్థాపన చేశారు. ఈ కార్యక్రమంలో రేమాండ్ గ్రూప్ ఎండీ గౌతమ్ మైనీ పాల్గొని, పెట్టుబడులపై వివరాలు పంచుకున్నారు. మొత్తం రూ.1201 కోట్ల పెట్టుబడులతో రాష్ట్రంలో మూడు కీలక ప్రాజెక్టులను రేమాండ్ గ్రూప్ ఏర్పాటు చేయనుంది. ఈ సందర్భంగా ముఖ్యమంత్రి చంద్రబాబు ప్రసంగిస్తూ, రాష్ట్ర అభివృద్ధి వైపు అడుగులు వేస్తున్నామని, పెట్టుబడులు ఎలా వస్తున్నాయో వివరించారు.

‘‘మా ప్రభుత్వం 20 లక్షల ఉద్యోగాలు కల్పించే లక్ష్యాన్ని వచ్చే మూడు నుంచి నాలుగేళ్లలోనే సాధిస్తామని హామీ ఇస్తున్నాము. అధికారంలోకి వచ్చిన 18 నెలల్లోనే రూ.20 లక్షల కోట్ల పెట్టుబడులు ఆకర్షించాం. 2027 నాటికి ఈ మూడు ప్రాజెక్టులు పూర్తిగా ప్రారంభమవుతాయని రేమాండ్ గ్రూప్ హామీ ఇచ్చింది. రాయలసీమలో స్పేస్ సిటీ, డ్రోన్ సిటీలకు శంకుస్థాపనలు చేశాం. కియా మోటార్స్ ఇప్పటికే పని చేస్తోంది. ఏరోస్పేస్, డిఫెన్స్ కారిడార్లు వచ్చేస్తున్నాయి. విమానాల వాడకం పెరుగుతున్న కారణంగా, వాటి ఉత్పత్తి కూడా మరింత పెరగాలి. రేమాండ్ గ్రూప్ దేశ ఏరోస్పేస్, రక్షణ అవసరాలకు అవసరమైన పరికరాలు తయారు చేయడం చాలా గొప్ప విషయం. విశాఖపట్నం ప్రపంచ స్థాయి డేటా సెంటర్‌గా మారనుంది. ప్రస్తుతం పర్యాటక రంగం కూడా వేగంగా అభివృద్ధి చెందుతోంది’’ అని చంద్రబాబు చెప్పారు.

రేమాండ్ గ్రూప్ ప్రాజెక్టులు రాష్ట్రంలో ఉద్యోగాలు, పరిశ్రమల అభివృద్ధికి దోహదపడతాయని అధికారులు తెలిపారు. సీఐఐ సదస్సు ద్వారా రాష్ట్రానికి మరిన్ని పెట్టుబడులు వచ్చే అవకాశం ఉందని, ముఖ్యమంత్రి చంద్రబాబు నాయుడు నాయకత్వంలో ఏపీ అభివృద్ధి పథంలో ఉందని నిర్ధారించారు. ఈ సదస్సులో దేశవ్యాప్తంగా పెట్టుబడిదారులు పాల్గొని, ఏపీలో అవకాశాలను చర్చించుకుంటున్నారు.