Hyderabad Court Verdict: హైదరాబాద్ కోర్టు తీర్పు: జగన్ లండన్ పర్యటనపై సీబీఐ పిటిషన్ డిస్మిస్.. షరతులు పాటించాడని ఆమోదం!

Hyderabad Court Verdict: అక్రమాస్తుల కేసులో ప్రధాన నిందితుడు, ఏపీ మాజీ ముఖ్యమంత్రి వైఎస్ జగన్‌మోహన్ రెడ్డి లండన్ పర్యటనపై సీబీఐ దాఖలు చేసిన పిటిషన్‌ను నాంపల్లి సీబీఐ కోర్టు డిస్మిస్ చేసింది. బుధవారం తీర్పు ప్రకటించిన న్యాయస్థానం, జగన్ బెయిల్ షరతులను ఉల్లంఘించలేదని స్పష్టం చేసింది. ఈనెల 11న తన పెద్ద కుమార్తెను చూడటానికి జగన్ లండన్ బయలుదేరిన విషయం తెలిసిందే. అయితే, ఆయన సొంత ఫోన్ నంబర్‌ను ఇవ్వకుండా షరతులు ఉల్లంఘించారని సీబీఐ ఆరోపించింది.

లండన్‌లో ఉన్న సమయంలో మాజీ సీఎంకు మూడుసార్లు కాల్ చేశామని, కానీ జగన్ ఇచ్చిన నంబర్ పనిచేయలేదని సీబీఐ కోర్టులో వాదించింది. ఉద్దేశపూర్వకంగా పని చేయని నంబర్ ఇచ్చారని, ఇకపై విదేశ పర్యటనలకు అనుమతి ఇవ్వకూడదని కోరింది. అయితే, జగన్ తరపు న్యాయవాది స్పందిస్తూ.. ఆయన స్వయంగా ఫోన్ వాడరని, గతంలో కూడా సిబ్బంది నంబర్లు మాత్రమే ఇచ్చామని వాదించారు. ఇరుపక్షాల వాదనలు విన్న కోర్టు, సీబీఐ పిటిషన్‌ను తిరస్కరించింది. ఈనెల 22న వాదనలు ముగిసిన తర్వాత ఈరోజు తీర్పు వెలువడింది.

కాగా, ఈనెల 1 నుంచి 30 వరకు 15 రోజుల పాటు లండన్ పర్యటనకు షరతులతో అనుమతి ఇచ్చిన కోర్టు, పర్యటన వివరాలు, ఫోన్ నంబర్, ఈమెయిల్ ఐడీలు అందించాలని, తిరిగి వచ్చిన తర్వాత ప్రత్యక్షంగా హాజరు కావాలని ఆదేశించింది. ఈ షరతులను జగన్ పాటించినట్లు కోర్టు ధృవీకరించింది. సీబీఐ గత వారం దాఖలు చేసిన పిటిషన్‌లో జగన్ షరతులు ఉల్లంఘించారని పేర్కొన్నప్పటికీ, న్యాయస్థానం దాన్ని తిరస్కరించడంతో జగన్‌కు ఊరట బలం చేకూరింది.