Vice President Radhakrishnan: సత్యసాయి దివ్య కృపతో 2047లో భారత్ అగ్రస్థానం.. ఉపరాష్ట్రపతి రాధాకృష్ణన్

Vice President Radhakrishnan: సత్యసాయి ఆశీస్సులతో 2047 నాటికి భారతదేశం అగ్రస్థానానికి చేరుకుంటుందని ఉపరాష్ట్రపతి సి.పి. రాధాకృష్ణన్ ఆశాభావం వ్యక్తం చేశారు. పుట్టపర్తిలోని శ్రీ సత్యసాయి ఇన్‌స్టిట్యూట్ ఆఫ్ హయ్యర్ లెర్నింగ్ (ఎస్‌ఎస్‌ఐఎచ్‌ఎల్) 44వ వార్షిక స్నాతకోత్సవంలో ఆయన ముఖ్య అతిథిగా పాల్గొన్నారు. ఈ సందర్భంగా విద్యార్థులకు డిగ్రీలు, గోల్డ్ మెడల్స్‌, పురస్కారాలు ప్రదానం చేశారు.

స్నాతకోత్సవానికి ముఖ్యమంత్రి ఎన్. చంద్రబాబు నాయుడు కూడా హాజరయ్యారు. ‘‘నవంబర్ 22 విశిష్టత గురించి సీఎం చెప్పగానే వస్తానని చెప్పాను. ఇప్పటికే దేశంలో ముగ్గురు ప్రముఖులు పుట్టపర్తిని సందర్శించారు. సత్యసాయి విద్యాసంస్థ స్నాతకోత్సవంలో పాల్గొనడం నాకు గొప్ప గౌరవం. సమాజ సేవ కోసం సత్యసాయిబాబా నాయకులను తయారు చేశారు. విద్యార్థులు రాజకీయాల్లోకి రావాలని లోకేశ్ ఆహ్వానించగానే అందరూ స్వాగతించారు. విద్యార్థులు దేశ నాయకులుగా ఎదుగుతారనే దానికి ఇదే నిదర్శనం. జీవితంలో ప్రతి రోజూ చాలా కీలకం. మానవ జీవితాలు యాంత్రికంగా, ఆధ్యాత్మికంగా సాగుతున్నాయి. విద్యాసంస్థ ద్వారా క్రమశిక్షణ, వ్యక్తిత్వ వికాసం నేర్పుతున్నారు. విద్యార్థులకు నైతిక విలువలు నేర్పే కేంద్రంగా సత్యసాయి విద్యాసంస్థ విలసిల్లుతోంది’’ అని ఉపరాష్ట్రపతి రాధాకృష్ణన్ ప్రసంగించారు.

సత్యసాయి వర్సిటీ విద్యార్థులకు మంచి భవిష్యత్తు: చంద్రబాబు

వ్యక్తిత్వ అభివృద్ధి కేంద్రంగా సత్యసాయి విశ్వవిద్యాలయం నిలుస్తోందని ముఖ్యమంత్రి చంద్రబాబు నాయుడు అభిప్రాయపడ్డారు. ‘‘సత్యసాయి వర్సిటీ విద్యార్థులకు మంచి భవిష్యత్తు ఉంటుంది. ప్రత్యేక ఆశయంతో సత్యసాయిబాబా భూమిపైకి అవతరించారు. సత్యసాయి.. భగవాన్ సాయి సిద్ధాంతం వ్యాప్తి చేశారు. క్రమశిక్షణ, ప్రేమ, సేవాభావం కలిగి ఉండాలని చెప్పారు. భారతదేశం.. వేల సంవత్సరాలుగా ఆధ్యాత్మిక భావనలతో వృద్ధి చెందుతోంది. ‘వసుదైక కుటుంబం’.. ప్రపంచమంతా ఒకే కుటుంబం అనేది మన సంస్కృతిలోని మహత్త్వమైన సిద్ధాంతం. సత్యసాయి విద్యాసంస్థలు నైతికత, మానవీయ విలువలతో కూడినవి. విద్యార్థులకు ఆధ్యాత్మికత, సేవాభావాన్ని ఇక్కడ నేర్పిస్తున్నారు. అందరినీ ప్రేమించాలి.. సేవ చేయాలి అనేది భగవాన్ సాయి సిద్ధాంతం. సహాయ గుణం కలిగి ఉండాలి కానీ, ఎవరినీ బాధపెట్టకూడదు. సత్యం, ధర్మం, శాంతి, ప్రేమ, అహింస అనే ఐదు మానవీయ సూత్రాలు చెప్పారు’’ అని చంద్రబాబు తెలిపారు.

కార్యక్రమంలో మంత్రి నారా లోకేశ్, శ్రీ సత్యసాయి సెంట్రల్ ట్రస్టు మేనేజింగ్ ట్రస్టీ ఆర్.జे. రత్నాకర్, విశ్వవిద్యాలయ ప్రిన్సిపల్, ఫ్యాకల్టీ సభ్యులు, విద్యార్థులు, తల్లిదండ్రులు పాల్గొన్నారు. స్నాతకోత్సవం ఆధ్యాత్మిక వాతావరణంలో సమ్ముఖస్థమైంది.