CM Chandrababu Naidu: గిరిజన ప్రాంతంలో ఉద్యోగాలు వారికే.. జీవో తెస్తాం: సీఎం చంద్రబాబు

CM Chandrababu Naidu: అల్లూరి సీతారామరాజు జిల్లా అరకులోయ మండలం గన్నెలలో ముఖ్యమంత్రి నారా చంద్రబాబు నాయుడు శనివారం పర్యటించారు. గిరిజనులతో ముఖాముఖి నిర్వహించి వారి సమస్యలు అడిగి తెలుసుకున్నారు. సంజీవని ప్రాజెక్ట్, ఆరోగ్య రథాలను ప్రారంభించి బహిరంగ సభలో ప్రసంగించారు.

ఏజెన్సీ ప్రాంతానికి వస్తే కొత్త శక్తి, ఉత్సాహం వస్తుందని సీఎం అన్నారు. గిరిజన ప్రాంతంలో ఉన్న ఉద్యోగాలన్నీ గిరిజనులకే దక్కాలనేది ప్రభుత్వ విధానమని స్పష్టం చేశారు. గతంలో తీసుకువచ్చిన జీవోను సుప్రీంకోర్టు రద్దు చేసినా, అందరికీ ఆమోదయోగ్యమైన కొత్త జీవోను త్వరలోనే తీసుకువస్తామని హామీ ఇచ్చారు.

సంజీవని వ్యవస్థ గేమ్‌చేంజర్‌గా మారుతుందని సీఎం పేర్కొన్నారు. మారుమూల ప్రాంతాల్లో కూడా నాణ్యమైన వైద్యం అందేలా చర్యలు చేపట్టామని, 3 నెలల్లో అన్ని ప్రాథమిక ఆరోగ్య కేంద్రాలు మెరుగుపరుస్తామని తెలిపారు. సెల్ టవర్లు పెంచి కనెక్టివిటీ పెంచుతామని, గిరిజనులకు 50 ఏళ్లకే పింఛన్లు అందిస్తున్నామని చెప్పారు.

అరకు కాఫీకి ప్రపంచస్థాయి గుర్తింపు తెచ్చామని, దీనితో గిరిజనులకు ఆదాయం పెరుగుతోందని సీఎం ప్రస్తావించారు. అడవితల్లి బాట పేరుతో రూ.1000 కోట్లతో 900 కిలోమీటర్ల రహదారులు వేశామని, 1.60 లక్షల ఇళ్లకు కుళాయి నీరు, సోలార్ రూఫ్ టాప్ ఏర్పాటు చేస్తామని హామీ ఇచ్చారు.

గన్నెల ఆర్.కె.నగర్‌లో 16 మంది గ్రామస్థులతో మాట్లాడిన సీఎం, గర్భిణుల వైద్య సేవలు, పిల్లల విద్యాభ్యాసం గురించి ఆరా తీశారు. థింసా నృత్యంతో గ్రామస్థులు స్వాగతం పలికారు. గిరిజన బిడ్డలు గిన్నీస్ వరల్డ్ రికార్డ్ సృష్టించినందుకు సీఎం ప్రశంసించారు.