AP CM Chandrababu: కలిసి ఎదుగుదాం.. తెలుగు రాష్ట్రాల మధ్య విద్వేషాలు వద్దు: ఏపీ సీఎం చంద్రబాబు

AP CM Chandrababu: రెండు తెలుగు రాష్ట్రాలు ఆంధ్రప్రదేశ్, తెలంగాణలు కలిసి ముందుకు సాగాలని, ఒకరికొకరు సహకరించుకుని ఎలాంటి విద్వేషాలు లేకుండా ప్రపంచంలోనే అత్యున్నత స్థాయికి ఎదగాలని ముఖ్యమంత్రి నారా చంద్రబాబు నాయుడు పిలుపునిచ్చారు. గుంటూరులో జరిగిన మూడో ప్రపంచ తెలుగు మహాసభల ముగింపు సభలో సోమవారం ఆయన ఈ విధంగా ప్రసంగించారు.

తెలుగువారి చరిత్రను గుర్తుచేస్తూ చంద్రబాబు మాట్లాడుతూ, మద్రాసీ నుంచి తెలుగు జాతిగా గుర్తింపు పొందిన నాటి నుంచి ప్రపంచవ్యాప్తంగా తెలుగువారు ఎంతో ఉన్నత స్థాయికి ఎదిగారని, సైబరాబాద్ ఐటీ విప్లవం మన స్థానాన్ని ప్రపంచంలో నిలబెట్టిందని వివరించారు. హిందీ తర్వాత రెండు రాష్ట్రాలు ఉన్న ఏకైక భాష తెలుగు అని, ఈ రెండు రాష్ట్రాలు కలిసి ఉంటే అనేక సమస్యలు సులభంగా పరిష్కరించుకుని ముందుకు వెళ్లవచ్చని అన్నారు.

జలవివాదాలపై స్పష్టమైన దృక్పథాన్ని వెల్లడిస్తూ, గోదావరి నది నీటిని తెలంగాణ పూర్తిగా వినియోగించుకున్నా తమకు ఎలాంటి అభ్యంతరం లేదని చంద్రబాబు స్పష్టం చేశారు. గతంలో కాళేశ్వరం ప్రాజెక్టు నిర్మాణంపై కూడా అడ్డంకులు సృష్టించలేదని, గోదావరిపై ఎన్ని ప్రాజెక్టులు కట్టినా సమస్య లేదని హామీ ఇచ్చారు. కృష్ణా, గోదావరి నదుల నుంచి గత ఏడాది 6,282 టీఎంసీల నీరు సముద్రంలో కలిసిపోయిందని, దేశంలోనే నీటి వనరులను పూర్తిగా వినియోగించుకోని ఏకైక దేశం మనదని ఆవేదన వ్యక్తం చేశారు.

పోలవరం పూర్తయితే కృష్ణా-గోదావరి అనుసంధానం సాధ్యమవుతుందని, నదుల అనుసంధానం ద్వారా దేశవ్యాప్తంగా నీటి సమస్యను పరిష్కరించాలనేదే తన లక్ష్యమని చంద్రబాబు పేర్కొన్నారు. తెలుగు రాష్ట్రాల మధ్య ఐకమత్యమే బలమని, విద్వేషాలు కాకుండా ఒకరినొకరు అర్థం చేసుకుని కలిసి ముందుకు సాగాలని పిలుపునిచ్చారు.

2047 నాటికి తెలుగు జాతి ప్రపంచంలో నంబర్ వన్ కావాలనేదే తన జీవితాశయమని చంద్రబాబు ఉద్ఘాటించారు. అమరావతిని ప్రజారాజధానిగా అభివృద్ధి చేసి ప్రపంచానికే ఆదర్శంగా నిలపాలని ఆయన ధీమా వ్యక్తం చేశారు.