Tirumala Tirupati Devasthanams: తిరుమల బంగారు దొంగతనం వార్తలు అసత్యం – టీటీడీ ఖండన

Tirumala Tirupati Devasthanams: తిరుమల శ్రీవారి పరకామణిలో భారీ స్థాయిలో బంగారం చోరీ జరిగిందని, కోట్ల రూపాయల విలువైన బంగారం మాయమైందని ఓ దినపత్రికలో ప్రచురితమైన వార్త పూర్తిగా అసత్యమని తిరుమల తిరుపతి దేవస్థానం (టీటీడీ) అధికారులు స్పష్టం చేశారు. ఈ కథనంలో వాస్తవాలను వక్రీకరించి, తప్పుడు ప్రచారం చేశారని ఆరోపిస్తూ టీటీడీ ఒక ప్రకటన విడుదల చేసింది.

టీటీడీ విడుదల చేసిన ప్రకటనలో వివరాలు ఇలా ఉన్నాయి: గత ఏడాది జనవరి 11న పరకామణిలో విధులు నిర్వర్తిస్తున్న ఔట్‌సోర్సింగ్‌ సిబ్బంది పెంచలయ్య అనే వ్యక్తి 100 గ్రాముల బంగారు బిస్కెట్‌ను అపహరించేందుకు ప్రయత్నించగా, టీటీడీ విజిలెన్స్‌, సెక్యూరిటీ విభాగాలు అప్రమత్తంగా వ్యవహరించి రెడ్‌హ్యాండెడ్‌గా పట్టుకున్నాయి. ఈ ఘటనకు సంబంధించిన ఆధారాలను కోర్టుకు సమర్పించినట్లు తెలిపింది.

దర్యాప్తు సమయంలో నిందితుడి ఇంటి వద్ద మరియు ఇతర ప్రాంతాల్లో సోదాలు జరిపినప్పుడు మరో 555.5 గ్రాముల బంగారు ఆభరణాలు, 157 గ్రాముల వెండి వస్తువులు బయటపడ్డాయి. వీటిని పోలీసులు స్వాధీనం చేసుకున్నారు. అలాగే, పోలీసు కస్టడీలో ఉన్న సమయంలో 76 గ్రాముల బంగారు ఆభరణాలు, ప్రముఖ జ్యువెలరీ దుకాణాల్లో బంగారం మార్పిడి చేసిన ఇన్‌వాయిస్‌లను కూడా స్వాధీనం చేసుకున్నట్లు పేర్కొంది.

దర్యాప్తులో 12 మంది సాక్షులను విచారించిన తర్వాత, అన్ని ఆధారాలతో పోలీసులు ఛార్జ్‌షీట్‌ దాఖలు చేశారు. ప్రస్తుతం ఈ కేసు న్యాయస్థానం పరిధిలో ఉంది మరియు తదుపరి విచారణ ఏప్రిల్ 13న జరగనుంది.

ఈ ఘటనను ఆ సమయంలోనే అన్ని ప్రసార మాధ్యమాలు విస్తృతంగా కవర్‌ చేశాయని టీటీడీ గుర్తు చేసింది. అయితే, ఈ వాస్తవాలను వక్రీకరించి పరకామణిలో భారీ బంగారు దొంగతనం జరిగినట్లు, కోట్లాది రూపాయల బంగారం మాయమైనట్లు ప్రచారం చేయడం పూర్తిగా నిరాధారమని స్పష్టం చేసింది.

పరకామణి ప్రక్రియలో బహుళ స్థాయి భద్రతా వ్యవస్థలు, కఠిన నియంత్రణలు, సీసీటీవీ పర్యవేక్షణ ఉంటాయని టీటీడీ తెలిపింది. అసత్య ప్రచారాలను నమ్మవద్దని భక్తులందరికీ విజ్ఞప్తి చేసింది.