Tirumala Adulterated Ghee Case: తిరుమల కల్తీ నెయ్యి కేసు: బాలాజీపై చర్యలు ఎందుకు ఆలస్యం?

Tirumala Adulterated Ghee Case: తిరుమల తిరుపతి దేవస్థానంలో జరిగిన కల్తీ నెయ్యి సరఫరా కుంభకోణంలో ముఖ్య బాధ్యుల్లో ఒకరిగా గుర్తించబడిన తితిదే ప్రధాన ఎకౌంట్స్ అధికారి ఒ. బాలాజీ ఇప్పటికీ అదే పదవిలో కొనసాగుతున్నారు. సుప్రీంకోర్టు నియమించిన ప్రత్యేక దర్యాప్తు బృందం (సిట్) ఒక వారం ముందు రాష్ట్ర ప్రభుత్వానికి లేఖ రాసి, బాలాజీతో పాటు అప్పటి ఈవో అనిల్‌కుమార్ సింఘాల్, అదనపు ఈవో ధర్మారెడ్డిలపై తగిన చర్యలు తీసుకోవాలని సిఫారసు చేసింది. సింఘాల్‌ను ఇటీవల బదిలీ చేసినప్పటికీ, బాలాజీపై మాత్రం ఇంతవరకు ఎలాంటి క్రమశిక్షణా చర్యలు లేవు. ఈ విషయం అందరినీ విస్మయపరుస్తోంది.

2004లో తితిదేలో చేరిన బాలాజీ, ఆర్థిక సలహాదారు మరియు ప్రధాన ఎకౌంట్స్ అధికారి (ఎఫ్‌ఏ అండ్ సీఏవో)గా కీలక పదవికి ఎదిగారు. సాధారణంగా ఈ పదవికి కేంద్ర సర్వీసులకు చెందిన ఐఏఅండ్‌ఏఎస్ లేదా ఐఆర్‌ఎస్ అధికారులను నియమిస్తారు. అయితే, సంప్రదాయానికి విరుద్ధంగా బాలాజీకే ఈ బాధ్యతలు అప్పగించారు. దీని వెనుక ఆయనను సులభంగా నియంత్రించవచ్చన్న ఉద్దేశ్యం ఉందని విమర్శలు వినిపిస్తున్నాయి. తితిదేలో ఏటా రూ.వేల కోట్ల విలువైన సరకు కొనుగోళ్లు, టెండర్లు, ఉద్యోగుల జీతాలు, డిపాజిట్లు, బడ్జెట్ వంటి అన్ని ఆర్థిక వ్యవహారాలు బాలాజీ పర్యవేక్షణలోనే జరుగుతాయి.

కల్తీ నెయ్యి సరఫరా కేసుకు మూలకారణమైన టెండరు నిబంధనల సడలింపు ప్రతిపాదనను 2020 ఫిబ్రవరి 14న బాలాజీ మరియు ధర్మారెడ్డి సిఫారసు చేశారు. అప్పటి ఈవో సింఘాల్ దానికి ఆమోదం తెలిపారు. కొన్ని నెలల ముందు మాత్రమే టెండరు నిబంధనలను కఠినతరం చేసిన విషయాన్ని ఈ నోట్‌లో ప్రస్తావించకపోవడం గమనార్హం. బాలాజీ సభ్యుడిగా ఉన్న కొనుగోళ్ల కమిటీ 2020 ఫిబ్రవరి 18న ఈ సడలింపుకు సమ్మతి తెలిపింది. అదే నెలాఖరున తితిదే బోర్డు కూడా ఆమోదించింది. ఈ మొత్తం ప్రక్రియలో బాలాజీ ప్రధాన పాత్ర పోషించారు.

సింఘాల్, ధర్మారెడ్డి, బాలాజీలు తీసుకున్న ఈ నిర్ణయాల వల్లే భోలేబాబా, వైష్ణవి, మాల్‌గంగా వంటి సంస్థలు టెండర్లు దక్కించుకుని కల్తీ నెయ్యిని సరఫరా చేశాయి. దీంతో సహకార డెయిరీలకు అవకాశాలు దక్కకుండా పోయాయి. ఈ కుంభకోణం వెలుగులోకి వచ్చినా బాలాజీపై చర్యలు తీసుకోకపోవడం పలు అనుమానాలకు తావిస్తోంది.