Chandrababu: బీసీ రిజర్వేషన్లను అడ్డుకుంటారా? సుప్రీంకోర్టులో తేల్చుకుంటాం: చంద్రబాబు

Chandrababu: స్థానిక సంస్థల్లో బీసీలకు 34 శాతం రిజర్వేషన్లు కల్పించే ప్రభుత్వ ఉత్తర్వులను హైకోర్టు కొట్టివేయడంపై ముఖ్యమంత్రి నారా చంద్రబాబు నాయుడు తీవ్రంగా స్పందించారు. గురువారం రేపల్లెలో నిర్వహించిన ప్రజావేదిక సభలో ఆయన మాట్లాడుతూ, బీసీలకు ఎలాంటి ఇబ్బంది లేకుండా సుప్రీంకోర్టుకు వెళ్తామని స్పష్టం చేశారు.

ఎన్టీఆర్ కాలం నుంచే బీసీలకు అండగా నిలిచి స్థానిక సంస్థల్లో రిజర్వేషన్లు అమలు చేశామని గుర్తు చేశారు. గతంలో గొడ్డలి పార్టీ (వైఎస్సార్‌సీపీ) బీసీ రిజర్వేషన్లను కత్తిరించి 24 శాతానికి తగ్గించిందని ఆరోపించారు. తాజాగా కూటమి ప్రభుత్వం మళ్లీ 34 శాతానికి పెంచినా, అదే పార్టీ కోర్టుకు వెళ్లి రిజర్వేషన్లను అడ్డుకుందని విమర్శించారు. ఈ తీర్పుపై సుప్రీంకోర్టులో అప్పీల్ చేస్తున్నట్లు తెలిపారు.

ఒక్క ఉపాధ్యాయ ఉద్యోగం కూడా ఇవ్వని వారు డీఎస్సీపై విమర్శలు చేస్తున్నారని, డీఎస్సీపై 300 కేసులు వేసి అడ్డుకోవాలని చూశారని దుయ్యబట్టారు. ఇప్పుడు బీసీ రిజర్వేషన్ల విషయంలో కూడా అదే విధంగా అడ్డుకుంటున్నారని మండిపడ్డారు.

సీఎం చంద్రబాబు మాటల్లో బీసీల పట్ల తమ నిబద్ధత స్పష్టంగా కనిపించింది. రాష్ట్ర ప్రభుత్వం ఈ అంశంపై సుప్రీంకోర్టులో పోరాడి బీసీల హక్కులను కాపాడుతుందని ఆయన సంకేతం ఇచ్చారు.