Y. S. Sharmila Slams YSR Congress Party: విజయమ్మ స్పష్టత ఇచ్చినా వైకాపా నాయకులు మొరుగుతూనే ఉన్నారు: షర్మిల

Y. S. Sharmila Slams YSR Congress Party: ఏపీసీసీ అధ్యక్షురాలు వైఎస్‌ షర్మిల  మాజీ మంత్రి వివేకా హత్య కేసును ప్రస్తావిస్తుంటే వైకాపా నాయకులు ఆస్తుల విషయానికి మళ్లిస్తున్నారని తీవ్రంగా మండిపడ్డారు. తాను ఎవరి ఆస్తినీ అనుభవించడం లేదని, ఆస్తులన్నీ జగన్‌కే చెందినవని స్పష్టం చేశారు.

తన పోరాటం, అజెండా ఆస్తుల కోసం కాదని షర్మిల పేర్కొన్నారు. ఆస్తులే తన లక్ష్యమైతే ఎప్పుడో కోర్టుకు వెళ్లి ఉండేదని వ్యాఖ్యానించారు. తల్లి వైఎస్‌ విజయమ్మ లేఖ ద్వారా ఆస్తుల విషయంలో పూర్తి స్పష్టత ఇచ్చారని, వాస్తవాలను తెలియజేశారని చెప్పారు. అయినప్పటికీ వైకాపా నేతలు మొరుగుతూనే ఉన్నారని ఆరోపించారు.

విజయమ్మ విడుదల చేసిన లేఖ నిజం కాదని, ఒత్తిడి చేసి సంతకం చేయించారని వైకాపా వర్గాలు ఆరోపిస్తున్నాయని షర్మిల పేర్కొన్నారు. ఒకవేళ తాను ఒత్తిడి చేసి ఉంటే, విజయమ్మ దానిని తిరస్కరించి చెప్పలేరా? అని ప్రశ్నించారు. లేఖ వాస్తవమని తెలిసినందునే జగన్‌ మాట్లాడలేదని, బదులుగా తన సైన్యాన్ని సోషల్‌ మీడియాలో మాట్లాడిస్తున్నారని విమర్శించారు.

మాట్లాడే దమ్ము, ధైర్యం జగన్‌కు లేదా? అని షర్మిల సూటిగా ప్రశ్నించారు. సాక్షి పత్రికలో రాజశేఖర్‌రెడ్డి ఫొటో, సత్యమేవ జయతే అనే బ్యానర్‌ వేశారని, కానీ విజయమ్మ లేఖను కనీసం చివరి పేజీలో కూడా ప్రచురించలేదని ఆరోపించారు. సత్యం పట్ల వారికున్న గౌరవం ఎంతో దీని ద్వారా తెలుస్తోందని వ్యాఖ్యానించారు.

ఈ వ్యాఖ్యలు వైఎస్‌ కుటుంబ ఆస్తుల వివాదం నేపథ్యంలో వచ్చాయి. విజయమ్మ లేఖలో ఆస్తుల పంపకం విషయంలో స్పష్టత ఇచ్చినా, వైకాపా నాయకులు దానిని అంగీకరించకుండా దాడులు కొనసాగిస్తున్నారని షర్మిల ఆగ్రహం వ్యక్తం చేశారు.