YS Jagan Disproportionate Assets Case: వైఎస్ జగన్ అక్రమ ఆస్తుల కేసు: మళ్లీ మొదటి నుంచి విచారణ

YS Jagan Disproportionate Assets Case: ఆంధ్రప్రదేశ్ మాజీ ముఖ్యమంత్రి, వైఎస్ఆర్ కాంగ్రెస్ పార్టీ అధినేత వై.ఎస్. జగన్మోహన్ రెడ్డి అక్రమ ఆస్తుల కేసుల విచారణ మరోసారి మొదటి దశకు చేరుకుంది. న్యాయమూర్తుల బదిలీల కారణంగా ఈ కేసులు దశాబ్దకాలంగా తేలకుండా జాప్యం జరుగుతున్నాయి. తాజాగా, సీబీఐ ప్రత్యేక కోర్టు జడ్జి బదిలీతో నిందితులు దాఖలు చేసిన డిశ్చార్జి పిటిషన్లపై కొత్తగా బాధ్యతలు చేపట్టనున్న జడ్జి డాక్టర్ కె. పట్టాభిరామారావు విచారణను తాజాగా ప్రారంభించనున్నారు.

సీబీఐ 11, ఈడీ 9 చార్జిషీట్లు దాఖలు చేసిన ఈ కేసుల్లో జగన్‌తో పాటు వి. విజయసాయిరెడ్డి, ధర్మాన కృష్ణదాస్, మోపిదేవి వెంకటరమణ, సబితా ఇంద్రారెడ్డి, గీతారెడ్డి, ఐఏఎస్ అధికారి శ్రీలక్ష్మి, మాజీ ఐఏఎస్‌లు మన్మోహన్ సింగ్, శామ్యూల్, బీ.పీ. ఆచార్య, జి. వెంకటరామిరెడ్డి వంటి అధికారులు, పారిశ్రామికవేత్తలు పెన్నా ప్రతాప్ రెడ్డి, ఇందూ శ్యాంప్రసాద్ రెడ్డి, రాంకీ అయోధ్య రామిరెడ్డి, ఇండియా సిమెంట్స్ చీఫ్ ఎన్. శ్రీనివాసన్ తదితరులు నిందితులుగా ఉన్నారు. వీరు సుమారు 130 డిశ్చార్జి పిటిషన్లు దాఖలు చేశారు. ఇప్పటివరకు ఈ పిటిషన్లపై పూర్తి విచారణ జరగలేదు.

2013 నుంచి ఈ కేసులను విచారించిన 8 మంది న్యాయమూర్తులు బదిలీ కావడంతో విచారణ పదేపదే మొదటి నుంచి ప్రారంభమవుతోంది. ప్రస్తుత జడ్జి డాక్టర్ టి. రఘురాం గతేడాది మే నుంచి బాధ్యతలు నిర్వహిస్తున్నారు. అరబిందో-హెటిరో భూకేటాయింపులు, రాంకీ ఫార్మా సిటీ గ్రీన్‌బెల్ట్ మినహాయింపులు, జగతి పబ్లికేషన్స్ పెట్టుబడులు, వాన్‌పిక్ ఓడరేవు, విమానాశ్రయాలు, దాల్మియా సిమెంట్స్ వంటి కేసుల్లో కొన్ని పిటిషన్లపై వాదనలు దాదాపు పూర్తయ్యాయి. ఐదు చార్జిషీట్లలో వాదనలు ముగిసిన తర్వాత ఉత్తర్వులు ఇవ్వాలని కోర్టు నిర్ణయించింది. కానీ జడ్జి బదిలీతో ఈ వాదనలు మళ్లీ మొదటి నుంచి జరగనున్నాయి.

సుప్రీంకోర్టు మార్గదర్శకాలు, హైకోర్టు గడువులు ఉన్నప్పటికీ విచారణలో జాప్యం కొనసాగుతోంది. 2023లో హైకోర్టు రెండు నెలల్లో విచారణ పూర్తి చేయాలని ఆదేశించినా, పత్రాల సంఖ్య ఎక్కువగా ఉండడంతో గడువు పొడిగింపు జరిగింది. తర్వాత జడ్జి బదిలీ, అనారోగ్యం వంటి కారణాలతో తీర్పు ఆలస్యమైంది. ఇప్పుడు మరోసారి కొత్త జడ్జి విచారణను రోజువారీగా చేపట్టనున్నారు.

ఈ కేసులు దశాబ్దకాలంగా పెండింగ్‌లో ఉండడం ప్రజాప్రతినిధుల కేసుల్లో జాప్యానికి ఉదాహరణగా మారింది.