Aston Martin: ప్రముఖ బ్రిటిష్ లగ్జరీ కార్ల తయారీ సంస్థ ఎస్టన్ మార్టిన్ భారతీయ ఆటోమొబైల్ మార్కెట్లో ప్రకంపనలు సృష్టిస్తోంది. భారత్ అలాగే యునైటెడ్ కింగ్‌డమ్ (UK) మధ్య కుదిరిన చారిత్రాత్మక ఫ్రీ ట్రేడ్ ఎగ్రిమెంట్ కారణంగా దిగుమతి సుంకాలు భారీగా తగ్గిపోయాయి. ఈ ట్యాక్స్ మినహాయింపు ప్రయోజనాన్ని కంపెనీ నేరుగా కస్టమర్లకు అందించాలని నిర్ణయించింది. ఫలితంగా భారతదేశంలో విక్రయించే ఎస్టన్ మార్టిన్ కార్ల ధరలు ఏకంగా రూ. 4.02 కోట్ల వరకు తగ్గిపోవడం ఆటోమొబైల్ రంగంలో హాట్ టాపిక్‌గా మారింది.

వాంక్విష్ వోలాంటేపై రూ. 4.02 కోట్ల భారీ తగ్గింపు

ఈ తాజా ధరల తగ్గింపుతో ఎస్టన్ మార్టిన్ లైనప్‌లోని దాదాపు అన్ని మోడళ్లు కస్టమర్లకు అత్యంత తక్కువ ధరకే అందుబాటులోకి వచ్చాయి. కంపెనీ అత్యంత ప్రతిష్టాత్మక ఫ్లాగ్‌షిప్ కారైన వాంక్విష్ వోలాంటే మోడల్‌పై అత్యధికంగా రూ.4.02 కోట్ల ధర తగ్గింపు లభించింది. గతంలో దీని ఎక్స్ షోరూమ్ ధర రూ.10.92 కోట్లుగా ఉండగా, ఇప్పుడు కేవలం రూ.6.90 కోట్లకే కొనుగోలు చేయవచ్చు. అలాగే వాంక్విష్ కూపే ధర కూడా రూ.3.71 కోట్లు తగ్గి రూ.6.40 కోట్లకు పడిపోయింది.

ఇతర మోడళ్ల ధరల్లోనూ గణనీయమైన కోత

కేవలం ఫ్లాగ్‌షిప్ మోడల్ మాత్రమే కాకుండా ఇతర స్పోర్ట్స్ కార్లు, ఎస్‌యూవీల ధరలు కూడా భారీగా పడిపోయాయి. బ్రాండ్‌లో అత్యంత సరసమైన మోడల్‌గా పేరున్న వాంటేజ్ ఎస్ ధర రూ.4.99 కోట్ల నుంచి రూ.3.15 కోట్లకు పడిపోయింది. దీని ద్వారా కస్టమర్లకు రూ.1.84 కోట్ల ఆదా అవుతుంది. వాంటేజ్ రోడ్‌స్టర్ ధర రూ.1.91 కోట్లు తగ్గి రూ.3.35 కోట్లకు చేరింది. అలాగే లగ్జరీ ఎస్‌యూవీగా పేరున్న డిబిఎక్స్ (DBX) ధర గతంలో రూ.6.80 కోట్లు ఉండగా, ఇప్పుడు రూ.2.65 కోట్లు తగ్గి కేవలం రూ.4.15 కోట్లకే లభిస్తోంది. డిబి12 ఎస్ మోడళ్ల ధరలు కూడా రూ.2.50 కోట్లకు పైగా తగ్గాయి.

లగ్జరీ కార్ల కొనుగోలుదారులకు గోల్డెన్ ఛాన్స్

బ్రిటన్ నుంచి దిగుమతి అయ్యే కార్లపై దిగుమతి సుంకం భారం తగ్గిపోవడంతో లగ్జరీ కార్ల మార్కెట్లో డిమాండ్ విపరీతంగా పెరిగింది. ఎస్టన్ మార్టిన్ తీసుకున్న ఈ నిర్ణయం వల్ల కోట్లు విలువ చేసే హై-ఎండ్ స్పోర్ట్స్ కార్లను కొనుగోలు చేయాలని భావించే పారిశ్రామికవేత్తలు, సెలబ్రిటీలకు పెద్ద ఊరట లభించింది. భవిష్యత్తులో యూరోపియన్ యూనియన్‌తో కూడా ఒప్పందాలు కుదిరితే మరిన్ని యూరోపియన్ లగ్జరీ కార్ల ధరలు తగ్గే అవకాశం ఉందని మార్కెట్ నిపుణులు అంచనా వేస్తున్నారు.

Tags: